BAJIK BAKA KUMANG…SERENA TONY DICKSON

Begelar Kumang ba Pekit Kumang Online berebutka Trofi Datuk Ali Biju, udah ngasuh nama Serena Tony Dickson dikelala mensia mayuh di selampur menua Sarawak.

Peranak menua Rumah Antau, Karangan Ara Sungai Pelagus Kapit tu madahka pemujur iya ba pekit tu endang dikena iya ngayanka ngepan asal sereta adat lama kitai Iban.

Ku Serena, ti mega anak ke lumur tiga lalu diatu agi besekula ba Sekula Sekondari (SMK) Kapit No 2, taja pan udah begelar Kumang tang pelajar seruran dikemeratka iya.

Lebuh dirandau Suara Sarawak, baka ni asai ati iya keterubah enggau masuk pekit tu laban tu mega dipandangkan ngena chara baru ketegal Atur Mindah Betagang (PKP) digaga dikena nagang pengerekai igi penyakit Covid-19 tu empai lama.

“Keterubah iya, asai ati endang kesal tang dibai keran ngujika nasip diri aku meransang diri empu dalam ati din.

BAJIK BAKA KUMANG…SERENA TONY DICKSON

“Pia mega, aku chukup temegah maya nemu diri udah mujur dipilih masuk ba renggat kedua laban tu mih keterubah aku bepekit ba luar.

“Laban ke ngelama tu, aku semina kala enggau bepekit ba rumah panjai aja,” ku Serena nusuika asai ati iya.

Ku iya, orang ti endang seruran meri iya peransang sereta sukung endang sida iya sebilik kelebih agi apai enggau indai iya empu.

Kelimpah ari nya mega, sama meri sukung ti kuat iya nya raban tim iya empu baka sida ari Momento Galeri, Keranjai Lulung Kapit sereta orang ti nyadi tulang belakang iya sekumbang enggau bepekit iya nya Pengajar Tony Buda sereta Gabriel.

Ku iya, Pengajar Tony enggau Gabriel endang semampai ngajar sereta nyukung iya dikena nyendiaka diri enggau pekit tu ari pun nyentukka pemujur iya.

“Lebuh aku masuk enggau Pekit Kumang Online tu, mayuh macham mih penguji ke nuntung aku sereta jaku pejah ari orang ti enda entu manah didinga.

“Kelimpah ari nya, penguji ngagai aku enggau raban aku lebuh maya begagaka video laban tiap kali kami ngaga video gaya hari enda entu manah.

“Kadang-kadang ribut, ujan sereta mega kudi ti nyadi ke penanggul tim aku lebuh beambika video ungkup pekit tu.

“Pekara nya mih ke ngasuh proses begagaka video kelalu lama sereta mayuh agi penguji ke enda alah dirintaika aku sekumbang enggau bepekit tu suba,” ku Serena.

Tang ku Serena, iya ulih napi penguji ti datai nekul iya laban ngembuan pengeliat ati sereta meransang diri empu kelebih agi ari jaku mensia mayuh ti bisi komen negative.

“Aku enda diasuh tim aku macha jaku pejah ti bisi dibantaika mensia mayuh ti enda ngenyamaika ati iya ke bisi dalam media rama ti ulih ngelemika semangat aku.

“Tang enggau berekat Petara, semua penanggul tu ditapi kami begulai lalu asil iya udah teulihka pemujur,” ku tusui Serena.

Suara Sarawak mega sempat nanyaka sapa bagi sepunsa ngepan iya lebuh enggau masuk pekit tu suba.

“Ngepan aku endang disepunsa Caroline RB sereta raban ari Keranjai Lulung mega bisi nambahka sekeda ngepan ke dikena aku,” ku iya.

Taja udah begelar Kumang, iya mega madahka juluk ati diri endang deka neruska pelajar ngagai tikas ti tinggi sereta deka mai pengaga ati ngagai sida iya sebilik dudi hari.

“Pesan aku nuju nembiak rebak baru, arapka kitai semua terus ngerembaika adat enggau main asal kitai Iban ambika enda tengelam ditelan pemansang dunya.

“Aku mega arapka kitai nembiak rebak baru anang kakang ati enggau orang bepekit ke besangkut paut enggau adat sereta main asal kitai.

“Anang malu mantaika pengelandik diri dalam pekit laban enti ukai kitai, sapa dikeandalka agi ngentanka adat lama enggau main asal kitai Iban,” ku Serena ngujungka randau.

PENGINGAT BEREGA…Serena nerima setipikit ari Datuk Ali Biju seraya dikemataka bala bukai pemngudah menang Pekit Kumang Online suba. 

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak