ADAT…Azizul enggau Ik Pahon nguluka mensia mayuh nyeradakka ai pengayu.

Rebak biak dipinta terus ngetanka adat lama ngambi enda punas diserunyut arus pemansang.

Ku Adun Tanjong Datu, Azizul Adenan, kitai ulih nyaguka baru adat lama ke meruan dipegai orang tuai diatu taja dalam pemansang teknologi enggau nengah program baka tu.

“Aku meransang nembiak belajarka adat lama nadai ngira main asal Melayu, Iban, Bidayuh enggau ke bukai.

” Kebuah pia laban kitai ba Sarawak mayuh kawin champur baka Melayu kawin Iban, Iban kawin China tang semua kitai udah lama ulih diau lantang begulai enggau pangan diri,” ku iya nerang.

Azizul mansutka jaku nya ba Pengerami Makai Lemai Pekit Kumang Dayung enggau Keling Pogan Gawai Renggat Pelilih Lundu 2022 di Dewan Cina Lundu.

Azizul benung mantaika jaku lalau ngagai mensia mayuh ke ngulu pengerami nya.

Nya kebuah ku Azizul, besai pengandal iya dekaka pekit baka tu ulih mai pengari nembiak ngagai renggat nengeri sereta ngagai tikas ke tinggi agi.

Program diatur Rukun Tertangga Batang Kayan (KRT) enggau kerejasama Palan Servis N3 Tanjong Datu dan Lundu Beauty Pegeantry Ediso mekitka tiga kategori iya nya Kategori Dayung Sangon dipenggi Maya Muyang, Dayung Bidayuh diempu Felicia Dorem enggau Larry Walter Brauh menggi gelar champion Keling Pogan.

Sama datai Sapit Sekretari Perintah Sarawak ke mega Presiden Serakup Nasional Dayak Bidayuh (DBNA), Datu Ik Pahon Joyik.

Suara Sarawak