MUKAH: Ejensi Kampung Sarawak (SFC) ngelalau pedagang sarang burung lelayang ba pasar ngiga endur bukai ke jauh agi tauka pindah dikena nyeliahka pekara ke enda disadang nyadi.

Ku Tuai Pegawai Eksekutif SFC, Zolkipli Mohamad Aton, pasar tau kamah enti semua sarang nya digaga ba pasar sereta bunyi inggar ari muzik burung nya.

“Nya kebuah, giga tanah kebun bukai ngambi ulih terus nupi sarang burung tu.

“Tang ari pekara dipadahka penyereta ba randau kami madahka ba taun 2015, burung di Mukah udah kurang laban umpan kurang sereta kelalu mayuh rumah burung digaga,” ku iya nerang.

Zolkipli mansutka jaku nya pengudah betuaika Randau SFC enggau Serakup Pedagang Sarang Burung Bagi Menua Mukah, apin lama ke udah.

Ku iya, sarang burung tu ulih terus dipejalai bepun ari palan ke endur nirika rumah nya enggau ngemeran pengawa ngintu rampa menua.

“Enti sema kitai ngerusak ke endur nya, burung lelayang enggai datai, bisi mega madahka chara ngumbai burung nya bebida amat ari jelu bukai baka chapi enggau kambin,” ku iya nerang.

Berebak enggau nya, iya madahka ubah gaya hari dunya nunjukka pemesai guna ngintu rampa menua taja rampa menua diatu chukup beguna ba pengawa dagang.

“Nya kebuah diatu, genap raban korporat diperansang ngintu rampa menua enggau chara ke betul (ESG), tiga pekara tu mesti dikemerat ngagai rampa menua kitai.

“Enti enda, hari deka angat, kampung angus enggau empas bukai. Nya kebuah kitai enggaika pekara tu nyadi ngagai uchu ichit kitai lalu meda pengerusak dikereja aki ini sida suba.

“Nya kebuah, jaga mih bumi tu ungkup pemaik begulai dudi hari ila,” ku iya madah nyemetak.

Iya mega madah, lisin sarang burung lelayang ke bisi dipinta beguna amat ngambi industri tu diaku ba renggat entarabansa enggaika bisi orang betalatka setipikit nya dudi hari nentuka pedagang nya bisi lisin tauka enda.

ZOLKIPLI MOHAMAD ATON

Suara Sarawak