KUCHING: Sebuah serikat pengerikod lagu pupu bansa WaveMix Production deka ngatur program The Voice of Borneo (TVOB) Lumpar Kedua.

Direktor WaveMix Production, Jimmy Pelikat madahka program tu diatur nengah kerejasama begulai enggau The Voice of Borneo Management, Dazzle Hole19 Café-Bistro Management sereta Wavemix Production.

Tambah Jimmy, program tu diatur dikena ngiga pengelandik ti bedau kala dibantaika peranak Pulau Borneo (Sabah, Sarawak enggau Kalimantan Indonesia).

Ku iya, program tu mega betuju endur ngiga penanyi baru ke bisi ngembuan kualiti sereta dikena ngangkat chara besemekih enggau pengawa ti betul ba tiap iku penyereta.

Kelimpah ari nya mega, program tu manah dikena pengerembaika industri muzik enggau seni kreatif sereta mega ngangkatka dunya pemerindang Dayak sama seikas enggau industri muzik dunya bukai.

JIMMY PELIKAT

“Ba lumpar keterubah diatur dalam taun 2019 suba, Produser Program TVOB iya nya Charlene CJ enggau komposer Jesley Jabu.

“Udah nya, ungkup TVOB Lumpar Kedua tu, Produser ke udah dipadu iya nya Charlene CJ, Jimmy Palikat enggau Uchu Belawing.

“Program tu kebendar udah berengkah ba renggat keterubah kena 16 April tu tadi, lalu renggat kedua ngujika penau diatur kena 24 April 2022.

“Berebak enggau nya, komiti pengatur program deka ngaga promosyen kena 6 Mei tu bepalan ba Plaza Merdeka di Kuching lalu renggat ketiga alai ngujika pengelandik diri deka diatur kena 7 Mei tu.

“Udah nya, pengawa ngatur pekit semifinal ditaga kena 22 Mei lalu pengawa mandangka baru sida ke menang ba renggat semifinal iya nya diatur kena 12 June 2022,” ku terang Jimmy.

Nangkan ke nya, ku Jimmy renggat kepenudi pekit tauka final Pekit The Voice of Borneo deka diatur kena 26 June 2022.

Udah nya, raban ke udah dipaduka nyadi akim iya nya Isa Lee (Ketuai akim), Charlene CJ, Jumpbull Harzel, Uchu Belawing sereta DJ Ivy Ubang.

Barang sapa ti bisi ati deka masuk program tu, ulih meda penerang silik ba laman rasmi Facebook The Voice of Borneo sereta mega tau datai maya pengawa ngujika penau diri ba Dazzle.

Penerang bukai tauka pekara bekaul tau ditanya terus nuju Uchu Belawing ba lumur telefon 013-8186684.

Pengawa nyain MoU Program The Voice Of Borneo ari Kaunsil Direktor (WaveMix Production) Eva Lyn enggau Pemenggi & bakih kunsi (Dazzle Hole 19 cafe & Bistro) Charlene CJ (kanan).

 

KEREJASAMA…Sempekat Pemereti Ati (MoU) bekaul enggau program The Voice of Borneo udah mujur disain Jimmy Pelikat (kiba) ngarika WaveMix Production enggau Alex Pui (pemenggi Dazzle Hole 19 Café & Bistro).

Suara Sarawak