KANOWIT: Opis Betanam Betupi Pelilih Kanowit dipinta ngatur mayuh agi program pemansang betanam betupi ba sitak Dun Ngemah.

Adun Ngemah, Anyi Jana madah, program tu dikena mantu nambahka produktiviti sereta pengelandik raban pekebun nyungkak ekonomi sida.

Pia mega, Anyi dekaka latih enggau bengkel ke patut dipejalai ungkup raban pekebun di Dun Ngemah.

“Opis Betanam Betupi mesti beratika sekeda isu baka bansa bantu ke bisi disediaka opis iya enggau Serakup Orang Bumai Pelilih Menua (PPK) Kanowit enggau bansa utai tanam ke manah ditanam ba Dun Ngemah,” ku iya.

Anyi mansutka jaku nya lebuh ngatur penemuai basa ngagai Opis Betanam Betupi Pelilih Kanowit, Hari Dua tu tadi.

Ba penemuai nya, iya udah diberi taklimat pasal isu betanam betupi enggau isu mungkur PPK Kanowit lebih agi ungkup sitak Dun Ngemah.

Anyi mega nerang pasal bajet ungkup aktiviti betanam betupi ke ulih dipinta ari Ejensi Pemansang Ulu Rajang (URDA) ngambi dipejalai ba Dun Ngemah.

Iya mega dekaka program kerejasama ngabas ngagai sitak Dun Ngemah entara palan servis iya enggau Opis Betanam Betupi Pelilih Kanowit suah agi dipejalai.

Sama datai Pegawai Opis Betanam Betupi Bagi Menua Sibu Badin Unor, Pegawai Opis Betanam Betupi Pelilih Kanowit Nicholas Jati, Menijar Besai PPK Kanowit Mohd Taufik enggau Chairman PPK Kanowit Tuai Rumah Sandai Rawing.

KE PENGINGAT… Anyi (empat kanan) nerima tepa ari Badin.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak