ROYSTON VALENTINE

KUCHING: Ulah gian dadah enggau judi online ti majak nyadi dalam komuniti ba Sarawak tu chukup ngirauka ati, ku Kaban Kunsil Nengeri (Adun) Tellian, Royston Valentine.

Dikena nagang ulah tu ari majak nyadi, Royston minta semua ejensi bekaul baka Ejensi Benchi Dadah (AADK) enggau Polis DiRaja Malaysia (PDRM) sereta ke bukai terus ransing agi bejalaika tanggungpengawa diri.

Ku iya, enggau pengawa neritka agi undang-undang dikearapka ulih nagang pengawa salah tu ari ti ulih ngerusak raban nembiak enggau menua ti ulih ngemai pengerugi dudi hari ila.

“Aku mega ngarapka bisi program diatur ngambika kitai nyeliahka sida ari ti tepejuh enggau pengawa ke salah tu.

“Aro mayuh program ti konsisten diatur dipelaba ulih ngurangka tauka nagang ulah ke enda menuku tu ari terus nyadi,” ku Adun Tellian nya.

Iya mansutka jaku munyi tu lebuh diberi peluang bejaku beserimbai enggau Hari Kedua Penggal Keterubah Aum Dun Sarawak Ke-19 kilah ensanus.

Ba pekara ke sama mega, iya minta mayuh agi aktiviti digaga dikena nempa modal mensia dipejalaika lalu iya ke udah tau ditampung.

Ku tandu iya, aktivti pemansang modal mensia mega mesti digaga lalu diteruska dudi ila ambika lebih mayuh agi belanja diungkupka dikena nempa modal mensia ti beguna.

“Meri tabi puji ngagai Opis Menteri Nembiak, Lumba enggau Pemansang Pedagang Sarawak ti udah ngemujurka mayuh langgur dikena begagaka aktiviti pemansang raban nembiak di Sarawak.

“Pia mega enggau penyereta ari Gerempung Ukai Dikuasa Perintah (NGO) baka Saberkas, Sarawak Volunteers enggau mayuh agi gerempung bekaul enggau nembiak di menua kitai dikearapka neruska program ti udah dilanggur,” ku Royston.

Suara Sarawak