SIBU: Kerejasama mensia mayuh beguna amat dikena ngemansangka baru sitak Dun Bukit Assek.

Adun iya, Chieng Jin Ek madah, sitak nya udah jauh tinggal sereta begunaka pelin perambu pemansang baru ke manah agi dudi hari.

Ku iya, Dun Bukit Assek udah 15 taun diarika parti ukai perintah ngujungka sitak nya pedis dikemansang.

“Pengelama 15 taun tu kitai nganti siku pengari rayat ari parti kitai (Parti Sa’ati Rayat Sarawak- SUPP) gawaka rayat ba sitak tu.

“Tang kena malam 18 Disember 2021, juluk ati kitai ngelama tu udah nyadi nyata. Nya kebuah nengah peluang diberi tu, aku naka ulih gawaka semua kitai sereta ngemansangka Bukit Assek tu,” ku Chieng.

Chieng mansutka jaku ba Pengerami Mantar Gawai Dayak 2022 Sitak Sentosa diatur Palan Servis N.51 Bukit Assek, apin lama ke udah.

Chieng madahka mayuh projek mesti dipejalai ba sitak Dun Bukit Assek dikena ngemanah tikas idup rayat dia.

Nya kebuah, iya begunaka kerejasama rat ari rayat dikena ngemujurka pemansang ke deka dipejalai ila.

“Sama mih kitai ngemansangka sitak tu nyadi sebengkah endur ke lantang enggau likun,” ku iya.

Chieng ke mega Sapit Chairman SUPP Pampang Bukit Assek meri besai terima kasih ke sukung enggau pengandal ari peranak ba sitak Sentosa ngagai iya lebuh pengawa bepilih empai lama.

Ku iya, program nyeleti rumah baka diperambu lebuh kimpin pengawa bepilih empai lama deka dipejalai.

Iya madah baru, semua orang tentu bisi ati dekaka sebuah rumah ti likun enggau lantang ungkup ruang bilik sida.

“Nya kebuah, rayat Sarawak ulih minta Bantu Nyeleti Rumah Sarawak di baruh Program Munaska Penyeranta ba Mengeri (PPKB).

“Program tu sebagi ari inisiatif perintah mantu rayat nentuka rumah sida diseleti manah agi ngambi nyendiaka rumah ti lantang enggau likun agi,” ku iya nerang.

Chieng madah, program nya mungkur pengawa nyeleti tauka nukar atap, dik, lantai, jenila, pintu, pagar, tangga enggau agu ke alai ungkus nyeleti ungkup tiap rumah nya penyampau RM15,000.

Nambahka nya ku iya, program nya dikena nyaga pengelantang rayat lebuh ngemanah rumah ke balat rusak.

“Aku tu orang ke mudah enggau berandau. Enti sema kita bisi perambu tauka sebana, tau datai betemu enggau aku lebih agi sida di sitak Sentosa ditu ke deka nemu silik pasal PPKB tauka minta bantu tu.

“Aku sedia gawa enggau mantu kita bulih mantu tu,” ku iya.

Pengerami nya richah diatur enggau pemerindang belagu, ngajat, chabut tikit benasip enggau ke bukai.

Lebih ari 100 iku peranak sitak Sentosa udah datai ngerichahka agi pengerami nya.

Sama datai Chairman SUPP Pampang Bukit Assek Datuk Chieng Buong Toon, Tukang Wang SUPP Pampang Bukit Assek Kaunselor Raymond Tiong sereta kaban parti bukai.

BERAMI KITAI… Chieng enggau bala bukai sama berami ngintu Pengerami Mantar Gawai Dayak enggau bala bukai

Suara Sarawak