SIBU: Parti Bansa Dayak Sarawak (PBDS) meransang komuniti Dayak ba selampur Sarawak beserakup baka dulu suba ngambika ulih negapka baru parti nya.

Sekretari Besai PBDS, Sai Melaka madahka pengawa Dayak beserakup dalam parti tu chukup beguna ke pemaik komuniti tu empu.

“Pia mega, kami ba PBDS minta semua raban parti ke kala nyemilik parti tu suba ulih nikal pulai baru sereta nyukung parti tu.

“Kita tau ngerejista diri nyadi raban parti nengah pampang ti besemak enggau kita ti udah dibuka berengkah ari diatu,” ku Sai Melaka ti mega nyadi ketuai PBDS Pampang Katibas madah nengah sebengkah penerang berita, kemari.

Nangkan ke nya, ku Sai Melaka, PBDS deka lebih chakah agi bejalaika aktiviti ti ulih nyerakupka baru kaban lama parti tu ti udah lama diau diri ba politik.

Ku iya, dikearapka enggau penyerakup raban bansa Dayak nengah parti tu ulih ngubah kuing politik menua dudi hari ila.

Iya mega madahka, dikena ngingatka pengada parti tu, sebengkah pengerami deka digaga ba menua Bintulu kena ke 14 Mei tu ila.

“Naka tu, lebih ari 300 iku raban parti udah madahka penatai diri ngulu pengerami Ngintu Pengada PBDS ti ditaga ba ujung minggu tu.

“Aku mega ngarapka mayuh agi raban parti ulih enggau ngulu pengerami tu lalu diatu peluang agi dibuka,” ku tandu iya.

Iya mega nerangka, tuju pengerami tu endang digaga dikena nyidi raban parti PBDS ke dulu suba lalu deka ngemai sida iya pulai baru ngagai parti tu.

“Ngagai kaban lama enggau iya ke deka masuk PBDS, kita tau betanya ngagai Ketuai Pampang bekaul pekara ti silik,” ku Sai Melaka.

Ungkup Pampang Miri (zon utara), tau betanya ngagai Sapit Presiden Adman Jubang ba lumur telefon 016-8968913, ba Sibu (zon tengah) tau betanya ngagai Mandal Presiden Julius Enchana 016-7501863.

Ba Kuching (zon Selatan) Sapit Presiden Dr Bego 011-2513621 tauka mega ngagai Sekretari Besai Sai Melaka ba lumur 016-4599011.

Tandu iya mega, pengawa Makai Lemai Mantar Gawai Dayak 2022 pan deka diatur ba Bagi Menua Sibu kena ke 21 Mei tu.

“Ba pengawa mantar gawai tu Pekit Kumang Gawai Dayak deka diatur ungkup raban enggau penyukung parti adap ke zon tengah Sarawak ti mega nyendiaka perais ti chukup manah,” ku iya nyebut bekaul pekit ti bisi diatur.

Sekretari Besai PBDS Sai Melaka.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak