BESAUP GAWA… Bala betuaika Tuai Rumah Robert benung kiruh nyeleti andau kayu ba jalai sida dia.

TATAU: Besai pengandal peranak ari Ex-Rumah Bakat anak Imang enggau Rumah Robert anak Nuing di Simpang Meruyau, Ulu Kakus ditu ngagai perintah beratika peminta nyeleti jalai ditengah sida.

Tuai Rumah Robert madah, nembiak redak ari dua buah rumah panjai nya ngarapka perintah bisi ngagihka geran Projek Mit Pemansang Menua Pesisir (MRP) dikena ngemanahka jalai sida dia.

Ku iya, taja andau kayu nya baru udah diseleti sida sebuat ngena chara begerempung empai lama tang likun agi enti sema andau nya diganti ngena engkelebat tauka infrastruktur ti menyana agi.

“Bisi tiga taun andau kayu tu udah digaga pengudah kayu engkelebat sebedau nya nyau repuk sereta enda likun ditengah agi.

“Nya alai kami ditu andal enggau arapka Perintah Sarawak kelebih agi Adun Kakus empu, Datuk John Sikie Tayai ulih meri perati lalu nyaup kami ngemanahka jalai tu ngambi lantang enggau likun agi ditengah,” ku iya lebuh dirandau Suara Sarawak.

SAUP KAMI… Tuai Rumah Robert enggau Sang sereta bala bukai begambar ba andau ti baru udah diseleti.

Tuai Rumah Robert enggau sida ke lelaki bukai ari dua buah rumah panjai nya udah ngatur pengawa besaup gawa nyayat enggau berangkutka ramu sereta ngaduka andau nya rambau kemisi hari besai empai lama.

Iya madah baru, jalai tama ke Simpang Meruyau endang patut digaga manah agi ungkup pengelikun maya beranjungka anak sekula enggau bejual asil utai tanam ti nyadika pun penatai pemisi peranak dia.

Siku ari peranak dia, Sang anak Sanjan mega minta kasihka ejensi enggau opis bekaul beratika penanggul ditapi sida semenua ti lama udah nganti jalai nya dikemanah.

Ku iya, enti udah bisi jalai meruan deka ulih marit pemansang bukai datai kia jemah nyengkaum infrastruktur pemun bukai baka bekal ai paip enggau bekal kuasa karan.

“Lama udah kami ngining jalai menua orang ti udah digaga meruan baka jalai sida ba Rumah Ado Bilong din. Enda ibuh sebutka belakin pan, anchauka batu enggau diadu manah udah pama.

“Kelimpah ari nya, kami mega arapka diri ampit ngasaika bekal ai beresi enggau bekal kuasa karan 24 jam disambung ari grid besai laban diatu agi ngandalka kuasa karan ari solar ti bisi tatak penyampau kuasa dikena,” ku iya mantaika peminta.

Sang madah baru, iya tepantup ati meda pemanah serakup sida ari dua rumah panjai ti beratka pengelikun enggau pengelantang kelebih agi bala ti deka pulai ke menua nyerumba Gawai Dayak tu ila.

“Ngambika pengelikun jalai ditengah bala ba dua rumah panjai tu, endang baka selama kami sebala ngaduka pengawa besaup.

“Ari ngiga enggau nyayat ramu, udah nya berangkut lalu ngaga andau, semua pengawa ti mar enggau berat dikereja berasai lempung. Tu mih pemanah kaul idup ba rumah panjai,” ku iya nyimpul kenang.

SAMA BETULUNG… Bala sida ke gawa nyayat ramu dikena nukar andau kayu ti udah enda likun ditengah.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak