PROF DR BROMELEY PHILIP

KUCHING: Pengerami Gawai Dayak tu mih pengerami besai dalam budaya kitai, ku Prof Dr Bromeley Philip.

Pia mega ku iya, Pengerami Gawai tu diintu sekali dalam setaun kena nandaka pemujur pengidup kitai dalam taun nya.

“Puji Tuhan, Pengerami Gawai Dayak 2022 tu ulih diintu kitai ngena chara beraban mayuh taja pen Atur Pengawa Standard (SOP) agi mesti dititihka kitai.

“Bekenangka reti Hari Gawai kitai Dayak, tu mih pengerami besai dalam budaya kitai ke disambut kitai sekali dalam setaun kena nandaka pemujur pengidup kitai dalam taun nya.

“Nyadi agi menya Gawai tu rami diintu ba rumah panjai nitihka macham atur gawai baka begelumu ngirup ai pengayu, ngalu Petara, program bebuti pangan diri, nirika pun ranyai, lalu kemaya tu suah bisi pengawa karoke beperindang diri serumah.

“Nyadi menya beserimbai gawai tu bisi adat bukai suah diatur tunga Saribas iya nya nurun meri anak mit mandi awakka sebati enggau endur pendiau ba rumah panjai,” ku iya nerang.

Nambahka nya ku iya, bisi mega bala nyerumba gawai ngatur gawai sandau hari ngintu perengka pengaruh sereta dinding bulu diri.

Nangkan nya ku Prof Dr Bromeley, mayuh mega bala ngulu Gawai tu bejadi melaki-bini melah pinang tauka nikah adat Iban.

Kelimpah ari nya, pengawa ngintu Gawai Dayak tu mega diintu bala Dayak ke diau ba mengeri enggau sida ke enda pulai ke menua.

“Ba runding aku, Gawai Dayak tu siti ari pengerami besai bansa kitai kena kitai begulai berami, ukai semina bala diri tang mega bansa bukai ke sama dikelalu datai ngabang sama berami.

“Nyadi, reti gawai tu dalam konteks raban bansa kemaya hari tu udah nyadi chara kaul ke manah enggau pangan diri, tau dikumbai kitai ‘chara beserakup entara raban bansa’ sama baka reti pengerami bansa bukai.

“Kena aku nyimpul kenang tu semina siti aja dikearapka aku jemah ila, iya nya Gawai Dayak tu dikelala sereta diakun Perintah Besai Malaysia nyadi hari besai sekayu Malaysia baka Hari Raya tauka Tahun Baru Cina.

“Selamat Ngintu Gawai Dayak nuju semua. Tuhan merekat semua kitai,” ku iya.

Suara Sarawak