PEKIT PEMAJIK… Pekit Kumang Kapit benung diatur mandangka pemajik gamal indu dara enggau pemanah ngepan dirasuk sida.

KAPIT: Dara bajik ari Rumah Laso, Nanga Entawau, Vanessa Teresa Angok udah narit ati bala juri sereta dipenggi gelar Kumang Gawai Kapit 2022 ke diatur ba Dataran Kapit, apin lama ke udah.

Vanessa, 18, udah ngalahka semilan pemekit bukai sereta mai pulai duit gawai penyampau RM2,500.

Kumang Kapit nya mega nerima perais bukai baka televisyen 42 inchi, baucher pemajik, trofi enggau hamper.

Pia mega, gelar Lulong enggau Selinggar Matahari bela diempu Clara Presila Moses enggau Catalina Paloma Tuah.

Seduai mujur mai pulai perais mata duit penyampau RM2,000 enggau RM1,500 seraya Clara mega dipilih nyadi pemenang ngepan pemadu manah.

Tujuh pemekit bukai mega nerima perais sagu ati RM550 sereta bela bulih bungai.

Perais nya udah disuaka Koordinator Pengawa Khas di Opis Premier Sarawak, Datin Seri Angelina Celestine Ujang enggau bini Kaban Parlimen Hulu Rajang, Datin Leyta Kupa.

Pekit Kumang Gawai Dayak Kapit nya diatur beserimbai enggau Bazaar Gawai Kapit (BGK) ke alai pengawa nangguhka bazar nya udah dipenyadi Kaban Parlimen Hulu Rajang, Datuk Wilson Ugak Kumbong ngarika Menteri Dagang Dalam Menua enggau Pekara Penguna, Datuk Seri Alexander Nanta Linggi.

Mensia mayuh ke datai mega diperindang penanyi tebilang Ricky L enggau raban Gerempung Kapit Tari mandangka Ngajat Ngalu Temuai.

Sama datai Residen Bagi Menua Kapit, Nyurak Keti, Pegawai Opis Pelilih Kapit, Ceriselogo Sabut enggau mega Chairman Komiti Pengatur Bazar Gawai Dayak, Temenggung Datuk Wilfred Billy Panyau sereta urung 2,000 peranak di Kapit.

KUMANG KAPIT… Vanessa udah dipadu ngempu gelar Kumang Gawai Dayak Kapit.   

 

PEKIT PEMAJIK… Pekit Kumang Kapit benung diatur mandangka pemajik gamal indu dara enggau pemanah ngepan dirasuk sida.

Suara Sarawak