BEJADI…Abang Johari (tengah) begulai enggau bala kaban SUPP seretai melai kek bejadika Aum Tiga Taun Sekali SUPP di Indu Opis SUPP ditu, kemari.Bela dipeda Presiden SUPP Datuk Sri Dr Sim Kui Hian enggau bala bukai. -Gambar ALIF NONI

KUCHING: Penegap Gempung Parti Sarawak (GPS) dikeandalka deka nyadi kelai penyulut Sarawak dalam Pengawa Bepilih Besai (PRU-15) ti deka datai.

Premier Sarawak Datuk Patinggi Tan Sri Abang Johari Tun Openg madahka, GPS dikearapka deka ngempu semua 31 penuduk parlimen dalam PRU tu ila.

“Dalam Pengawa Bepilih Besai Nengeri (PRN-12) tu tadi, GPS udah ngelaika penyulut kelebih agi lebuh parti komponen Parti Sa’ati Rayat Sarawak (SUPP) mujur ‘nyapu’ Miri, Bintulu enggau Sibu.

“Pekara tu nunjukka rayat kelebih agi bansa China udah mulaika pechaya sida ngagai SUPP,” ku iya.

Abang Johari bejaku munyi nya lebuh Bejadika Aum Tiga Taun Sekali SUPP di Indu Opis SUPP ditu, kemari.

Ku iya, penyulut teulihka 76 penuduk ari 82 penuduk Dun siti kenang ti manis laban SUPP mujur ngambi pulai penuduk Dun Pujut, Dun Tanjung Batu enggau sekeda penuduk bukai.

“Kitai bisi polisi ti inklusif lebuh komuniti China mai pekara pelajar bansa China lalu ditimbal manah Perintah Sarawak merembu pelin timpuh panjai ngasuh bala sida pechayaka kitai.

“Ungkup Sibu, kitai deka ngemansangka Dun Bukit Assek pengudah pelin tembu awakka Sibu nyadi sebuah mengeri ti baru.

“Pekara tu siti pekara ti patut dibayar ngagai rayat nya alai aku sigi amatka semaya,” ku iya.

Taja pia, ku iya, mengeri Kuching mega enda deka tinggal laban terus deka dikemansangka nyadi mengeri ti moden.

Iya madahka, pekara sentang sempekat MA63, tekat bakun, Petros, minyak enggau gis di menua tu diperambu iya ungkup meri pemaik ngagai rayat.

“Anang irau Sarawak enda deka bankrupt, aku enda budu.

“Enda meh kitai nguna belanja aja tang nadai ngiga chara ngulihka duit.

“Bisi orang ngumbai menua kitai deka bankrupt dalam timpuh tiga taun, nyentukka diatu lima taun aku megai Sarawak, kitai nadai bankrupt tang duit bisi nambah,” ku iya.

Suara Sarawak