PENEMUAI BASA…Raban IBCCK betuai Sekretari Perintah Nengeri Datuk Amar Jaol Samion (tiga kanan) begambar kenang pengudah ngatur penemu basa ngagai Opis Sapit Menteri Pelajar Inovasyen enggau Pemansang Penau, Datuk Francis Harden Hollis kena Hari Lima minggu ke udah.

KUCHING: Komiti Besai Kelab Iban Balau Kuching (IBCCK) diulu Sekretari Perintah Nengeri ke mega Chairman IBCCK, Datuk Amar Jaol Samion bisi ngatur penemu basa ngagai Sapit Menteri Pelajar, Inovasyen enggau Pemansang Penau, Datuk Francis Harden Hollis.

Nitihka penerang tuju penemuai nya laban deka nerangka ngagai Harden perambu program ke deka diatur IBCCK lebih agi bekaul enggau pansik peturun Iban Balau.

Kelab ke udah direjister ba Opis Pengerejister Gerempung (ROS) nya naka tu udah bisi 200 iku kaban sereta udah bisi opis kediri empu ba Jalai Stampin Baru, Kuching.

Kenu ku penerang nya mega, IBCCK ditumbuh ngambi bisi nyadi pelasar dikena mantu mensia mayuh ari sukut pengelantang pendiau, pekara pelajar lebih agi komuniti ke datai ari menua Banting, Lingga, Pantu enggau Simanggang, Sri Aman.

Beserimbai enggau penemuai nya mega, IBCCK bisi minta belanja lalu pekara nya terus nerima timbal ari Adun Simanggang ke lalu ngemendarka agih belanja sepenyampau RM30, 000 dikena sida ngatur program bekaul ungkup taun tu.

Udah nya, ba pengujung randau raban IBCCK bisi nyuaka bup Agi Idup Agi Ngelaban ngagai Harden enggau Jaol.

Bup nya nyeritaka kisah raban Sarawak Renjers maya jeman konfrontasi ngelaban komunis kelia. Bup penebal 300 limpir surat nya dikarang Prof Dr Neilson Ilan Mersat, Dr Regina Garai enggau Lt Kol (B) Mohd Melintang Abdullah.

Sama bisi enggau ba pejalai meri basa tu iya nya Melintang, Datuk Grunsin Ayom, Stell Sindau, James Jawat Kasa, Christhe Mansom
enggau Monica Midi.

Suara Sarawak