KUCHING: Perintah Sarawak nengah Opis Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit setuju bejalaika atur lengkas bekaul peminta sida ke nadai surat pengada di Sarawak.

Menteri iya, Datuk Seri Fatimah Abdullah madah, pemutus nya bepanggai ngagai Opis Menteri Dalam Menua di Baruh Bahagian III Perlembagaan Persekutuan.

“Tu mungkur atur perintah besai di baruh Perkara 74 dibacha begulai enggau Perkara 5 Senarai Persekutuan Jadual Kesembilan Perlembagaan Persekutuan.

“Anak mit nadai surat pengada ukai pekara dikerandau di baruh atur Pengawa Meri Kuasa (DOP) laban isu peranak udah dsetuju nyadi pekara diputar Perintah Besai,” ku iya.

Fatimah mansutka jaku nya lebuh nyaut tanya Adun Meradong bekaul isu peranak lebuh Aum Penggal Keterubah Dun Sarawak Ke-19, kemari.

Nambahka nya ku iya, di Malaysia status peranak ditetapka nitihka status nikah enggau status peranak apai indai kandung anak mit baru ada nitihka pekara ke udah ditetap.

Nya kebuah, pengudah anak ada sebedau apai indai rejister nikah, surat pengada anak nitihka status peranak indai bepelasarka atur undang-undang di baruh Seksyen 17, Bahagian III, Jadual Kedua, Perlembagaan Persekutuan.

“Isu anak ti diada ba menua tu nadai surat pengada deka nyadi laban apai indai enda bejalaika tanggung pengawa ke patut,” ku iya.

Nya kebuah, Komiti Khas Status Peranak di baruh Perkara 15A, Perlembagaan Persekutuan Peringkat Negeri ditumbuh dikena ngemuntangka pengawa beratika peminta nyadi peranak ti diterima di Sarawak.

Fatimah madah, pengada anak di menua tu ukai jamin sida diaku nyadi rayat Malaysia.

“Nya alai, perintah bejalaika inisiatif mutarka isu nyadi peranak nengah peminta nyadi rayat Malaysia.

“Bisi dua chara nyadi peranak menua sekalika nengah rejister tauka naturalisasi nitihka atur ti ditetapka dalam Konstitusyen Perintah Besai,” ku iya.

Ngelansa silik, Fatimah madahka program advokasyen mega diatur enggau kerejasama ejensi perintah ba menua tu nengah Kaunsil Pemansang Pekara Rama nengah opis menteri iya ngambi meri penyedar pasal isu peranak menua.

DATUK SERI FATIMAH ABDULLAH

Suara Sarawak