BERITA MANAH… Penerang dikerembai ba media rama ti madahka Jaku Iban deka ayan ba keynote Google ila.

KUCHING: Frasa Jaku Iban ayan ba keynote Google ulih narit Jaku Iban ngambika tetap relevan ba dunya kontemporari.

Direktor Palan Pematih Pengajar (IPG) Kampus Batu Lintang, Dr. Lambat anak Lindong madahka pengawa nya chukup manah, mandangka jaku Iban nyingkang mansang seriris enggau jaku bukai.

Pia mega ku iya, pengawa nya ulih narit jaku Iban ngambika tetap relevan ba dunya kontemporari diatu lalu ukai semina dikena kitai ngetanka daya idup asal enggau cherita lama kitai Iban aja.

“Ngena peluang tu, kitai ulih ngiga sereta nempa frasa jaku Iban ke baru dikena nipak frasa jaku English.

“Taja pia, anang aja salin nya ila mayuh jayar reti, baka enggi Jaku Melayu ke dipeda kitai diatu. Nya ukai ngemansangka jaku Iban tang nyau ngenyarutka jaku kitai,” ku iya.

Dr. Lambat nibarka penemu nya lebuh dipinta nimbal penerang dikerembai ba media rama ti madahka Jaku Iban deka ayan ba keynote Google ila.

Ari nya ku iya, bala ke benung belajar ba palan pelajar tinggi kelebih agi bisi bekenaka Jaku Iban, patut ngaga pansik tauka nungkap pekara nya enggau lenak sereta silik agi.

“Kitai endang meransang rebak baru mansik, ngiga enggau nempa frasa jaku Iban ke baru dikena nipak frasa jaku English ngambi reti dikalih ila enda lari ari asal.

“Aku temegah enggau gaga bendar ati laban pengawa tu benung dikereja bala sida diatu lalu dikeandal ulih nangkup peminta enggau guna lebuh datai ba maya iya ila,” ku iya ngempung penemu diri.

Dr. Lambat Lindong

Suara Sarawak