IR AIDEL LARIWOO

KUCHING: Perambu nyeleti Jalai Batu Kitang nuju Jalai Datuk Stephen Yong ngagai empat arung deka dibantai di baruh pansik setengah penggal ba taun 2023.

Sapit Menteri Infrastruktur enggau Pemansang Palan Penyangkai Kapal Sarawak, Ir Aidel Lariwoo madah, nya sebagi ari perambu jalai dalam Bagi Menua Kuching di baruh Pakej D.

“Naka diatu, pelin ungkup Jalai Batu Kitang udah tembu enggau projek ungkup perambu nya deka dibantai di baruh pansik setengah penggal dalam taun 2023 ngambi diperunding,” ku iya nerang.

Aidel mansutka jaku nya lebuh nyaut tanya Adun Batu Kitang, Lo Khere Chiang pasal perambu nyeleti Jalai Batu Kitang-Jalai Datuk Stephen Yong ngagai empat arung ba Aum Dun Sarawak Ke-19, kemari.

Bekaul pakej di baruh Projek Nembuka Perambu Jalai Dalam Bagi Menua Kuching, Aidel madah bisi Lima pakej ti diperambu di baruh projek tu.

Ku iya, semina dua pakej benung digaga enggau tiga pakej agi dalam proses pelin.

Ku iya, pakej keterubah iya nya nyeleti jalai siti arung ngagai dua arung ari selingkut jalai Mardi/Sultan Tengah ngagai selingkut jalai Demak/Gersik beungkus RM65,888,888.80.

Taja pia ku iya, pejalai projek nya diatu udah tembu 21.85 peratus enggau laun tembu 6.2 peratus ari taga asal.

“Nya kebuah, haribulan nembu ka projek ti diperesa baru iya nya kena 2 Julai 2023,” ku Aidel nerang.

Nangkan nya ungkup pakej kedua, iya madahka nya projek nyeleti jalai me diatu sepemanjai 12.5km ngagai dua arung enggau tiga jematan RC (konkrit bertetulang) di Sungai Semenggok, Sungai Keranji enggau Sungai Kuap.

“Projek ti dipelanja Perintah Besai nya beungkus RM179,888,000 lalu diatu udah tembu 25.58 peratus iya nya 0.77 peratus tumu agi ari taga asal.

“Haribulan projek tembu ti diperesa baru iya nya kena 9 June 2023,” ku iya nerang baru.

Iya mega madah, tiga agi pelin pakej udah tembu enggau sedia ditinda.

Pelin nya dikena nyeleti jalai ke bisi diatu sepemanjai 7km enggau siti jematan RC meraka Sungai Semariang ari simpang Kopodium (Jalai FAC) ngagai selingkut jalai Mardi ; nyeleti jalai sepemanjai 9km ari simpang Jalai Batu Kawa nuju simpang Batu 7 enggau projek jalai baru U5 sepemanjai 9.5km enggau siti jematan RC meraka Sungai Sarawak ari simpang Stephen Yong ngagai simpang Kopodium (jalai FAC).


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak