NERANG…Aidel bejaku nyaut tanya Adun Ngemah Anyi Jana ba Aum Dun ditu, kemari.

KUCHING: Perambu pengawa ngaga Jalai Ngungun-Jagau, Kanowit Seksyen Kedua dipelabaka tembu kena 2 Mei 2023.

Sapit Menteri Pemansang Infrastruktur Enggau Penyangkai Kapal l Ir. Aidel Lariwoo madahka pemanjai semua jalai ari Ngungun ke Jagau, Kanowit ti deka digaga nya bisi 20.22 kilometer.

“Skop pengawa ti diperambu tu mungkur pengawa ngaga 7.22 kilometer jalai baru ari Opis Kereja Raya (JKR) RJ Standard, ngaga jalai penyambung 3.6 kilometer enggau ngaga dua buah jematan semin dikumbai Jematan Sungai Ngemah 1 enggau Jematan Sungai Sebatu.

“Projek tu benung digaga ke alai naka April 2022, 12.20 peratus udah tembu digaga enti dibanding enggau taga asal iya nya 24.88 peratus,” ku iya.

Aidel bejaku munyi nya nyaut tanya Adun Ngemah Anyi Jana ba Aum Dun ditu, kemari.

Ku iya, projek ngaga Jalai Nanga Ngungun-Nanga Jagau, Kanowit dibagi ngagai tiga seksyen.

Iya madahka tiga bengkah seksyen tu iya nya projek nyeruri Jalai Nanga Ngungun ke Nanga Bat (Sekseyn1), ngaga Jalai Ngungun-Jagau Kanowit pemanjai 7.22 kilometer (Seksyen 2) enggau projek ngaga Jalai Nanga Pera ke Nanga Jagau pemanjai lapan kilometer (Seksyen 3).

“Bagi Seksyen 1 enggau Seksyen 3, raban opis JKR Sarawak agi nganti pemendar nukar skop enggau nama projek ari Opis Menteri Pemansang Menua Pesisir (KPLB),” ku iya.

Suara Sarawak