KUCHING: Siti ari empat jematan lambung di Jalai Kuching-Serian ti nyadi sebagi ari Projek Jalai Raya Pan Borneo ba Batu 10 udah dibuka ngagai bala penguna jalai alun.

Menteri Kanan Kereja Raya Datuk Seri Fadillah Yusof madahka jematan nya Pakej Ke-2 ari Sematan ke Jalai Kuching Serian ti deka meri pemaik ngagai peranak di Kuching,Padawan enggau Siburan.

“Aku deka meri terima kasih ngagai penguna jalai raya ti sabar lebuh raban kunteriktor ngadu pengawa ke alai diatu penyabar kita nya dibayar enggau penembu projek tu taja pan bisi agi sekeda projek jematan dipelabaka deka tembu enda lama agi.

“Raban kunteriktor, Opis Kereja Raya (JKR) Sarawak tadi madahka aku Jematan Lambung ba Batu 7 deka dibuka sepiak (siti arung) sebedau Hari Gawai lalu Jematan Batu Lambung 6 deka tembu ujung bulan June,” ku iya.

Fadillah bejaku munyi nya ba Program Bejadika Jematan Batu 10 di Palan Paking Kerita Giant Padawan ditu, pagi tadi.

Berebak enggau nya, Fadillah mega madahka Projek Jalai Raya Pan Borneo diatu agi benung dipejalaika, ke alai bala ejensi bekaul mesti nyaga pejalai trafik awakka penguna nadai napi penanggul jalai sekut.

“Tu endang nyadi penanggul ngagai raban kunteriktor lebuh ngaga pengawa maya orang benung ngena jalai raya mansa kin kia, tang aku minta ngambika semua ejensi bekaul tu ulih ngurangka penanggul nya ungkup pengelikun enggau penyamai bala penguna.

“Nyema bisi kompelin, penguna jalai raya ulih madah ngagai JKR enggau opis menteri ngambika kami ulih ngiga chara mutarka sekeda penanggul ti nuntung kita,” ku iya.

Iya madahka, penembu projek tu ukai semina ngemuntangka mobiliti rayat tang mega ngasuh pekara perengka pengangkut menua lebih jampat.

“Aku ngarapka nya deka meri pemaik ngagai rayat enggau bala pedagang ti suah nengah jalai raya nya.

“Mayuh palan deka muntang ngatur kaul kerejasama baka pejalai ari Kuching ke Serian deka jampat agi, likun enggau lanchar,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak