KAPIT: Semua injinir Opis Kereja Raya (JKR) udah diasuh ngiga enggau ngerikod palan pengentap menua pesisir enggau genturung pendiau ke bedau disikap jalai alun.

Sapit Premier Sarawak, Datuk Amar Douglas Uggah Embas madah, iya dekaka penanggul jalai penyampau ulih dikenatai ngagai sida terus.

“Perintah Sarawak keran mutarka isu baka tu, kitai deka beratika rikod enggau berengkah merambu nyendiaka jalai alun.

“Endang udah tuju kami nyambung mengeri enggau menua pesisir manggai taun 2030 lalu aku naka ulih nyapai tuju tu,” ku Uggah.

Uggah mansutka jaku nya lebuh bejadika Aum Pengari Tiga Taun Sekali Parti Pesaka Bumiputera Bersatu (PBB) Pampang Katibas, Bukit Goram, Baleh enggau Pelagus di Palan Sivik, apin lama ke udah.

Uggah ke mega Menteri Pemansang Infrastruktur enggau Palan Penyangkai Kapal madah, nadai pengentap menua pesisir tauka rumah panjai patut dikelaung ari disikap jalai alun ba menua tu.

Ku iya, rayat deka tinggal ari arus pemansang enti pekara baka nya majak nyadi.

“Kami (Perintah GPS) dekaka rayat ngasaika mayuh agi pengelantang. Nya kebuah, kami naka ulih ngemanah semua perengkaguna enggau infrastruktur.

“Udah nya, kami deka nampung bemacham aktiviti enggau program mantu rayat nambahka penatai pemisi,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak