SEBUYAU: Mandal Presiden Parti Pesaka Bumiputera Bersatu (PBB) Datuk Julaihi Narawi ngenuku diri deka ngetanka penuduk nya rambau Aum Tiga Taun Sekali PBB bulan June tu ila.

Adun Sebuyau nya enggai bejaku mayuh tang semina nyaut pandak aja lebuh ditanya raban media bekaul pekara nya.

“’Insya-Allah’ aku deka ngetanka pangku pengawa Mandal Presiden PBB ti disandang aku dua penggal ti udah lalu,” ku iya.

Iya bejaku munyi nya lebuh ditanya pemberita pengudah Bejadika Pengerami Ngelalu Pengabang Hari Raya Aidilfitri 2022 Renggat Dun Sebuyau di Balai Pemansang Sebuyau ditu, tadi

Julaihi entara empat iku chalun ti bulih undi tinggi iya nya 770 undi lebuh berebutka pangku pengawa Mandal Presiden PBB bagi renggat 2018 nyentuk 2020.

Tiga chalun bukai ti mega teulihka pangku pengawa tu iya nya Adun Nangka Dr Annuar Rapae (746 undi), Adun Pantai Damai Datuk Dr Abdul Rahman Junaidi (719 undi) enggau Adun Asajaya Datuk Seri Datuk Abdul Karim Rahman Hamzah (698 undi).

Sama bisi datai rambau pengerami nya kemari Kaban Parlimen Batang Lupar Datuk Seri Rohani Abdul Karim, Residen Bagi Menua Samarahan Brahim Lumpu enggau bala bukai.

NGABANG DI SEBUYAU…Datuk Julaihi ngangkat jari ngagai mensia mayuh rambau datai ngulu Pengerami Ngelalu Pengabang Hari Raya Aidilfitri 2022 Renggat Dun Sebuyau di Balai Pemansang Sebuyau ditu, tadi. -Gambar RAMIDI SUBARI

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak