DATUK SNOWDAN LAWAN

KUCHING: Perintah udah nyeleti lima kubu besejarah di Sarawak ngena agih belanja penyampau RM25 juta kenyau ari taun 2014 nyentuk 2020.

Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan madah, semua kubu nya udah diseleti Opis Muzium nengah program ngemanah enggau nyeleti kubu besejarah.

“Keterubah nya Kubu Alice, Sri Aman ti diseleti kena Disember 2014 beungkus RM5 juta.

“Udah nya Kubu Emma, Kanowit ti diseleti Disember 2019 ngena agih belanja RM5.5 juta.

“Tiga agi kubu diseleti ba taun 2020 iya nya Kubu Hose, Marudi (RM4 juta), Kubu Brooke, Julau (RM5 juta) enggau Kubu Lily, Betong beungkus RM5.5 juta,” ku Snowdan.

Adun Balai Ringin mansutka jaku nya lebuh nyaut tanya tambah Adun Kalaka Mohamad Duri ba hari ketiga Aum Dun, kemari.

Ku iya, pengudah semua kubu nya tembu deka bisi galeri mandangka sejarah rama pemansang pasar sereta komuniti nyadika pematak dagang temuai.

“Ambika banding, Kubu Alice udah diangkat nyadi Muzium Warisan Sri Aman ke alai pengujung ulih meda enggau meretika sejarah budaya komuniti ba sitak nya.

“Sama mega enggau Kubu Lily, Kubu Emma, Kubu Hose enggau Kubu Brooke…deka disikap galeri.

“Kebuah pia laban kubu tu nyadi pematak ngagai bala bukai meretika sejaran rama komuniti dia,” ku iya nerang.

Ngelansa pasal Kubu Ranee di Saratok beumur 134 didiri Charles Brooke, Snowdan madahka kubu nya diperambu digazet nyadi begunan pesaka Sarawak.

Nambahka nya ku iya, kubu nya ngembuan besai guna nyadi ois perintah kenyau ari didiri Charles Brooke dalam taun 1888.

“Nya alai, opis menteri enggau Opis Muzium Sarawak benung merambu sereta ngazet kubu nya nyadi begunan pesaka Sarawak di baruh Ordinan Warisan Sarawak 2019,” ku iya nerang.

Opis menteri deka ngulihka belanja nyeleti kubu nya ngambi nyadi ikon di Saratok sereta nyadi palan ditapat mensia mayuh beduduk ari Kubu Ranee suba kala nyadi Opis Kaunsil Pelilih Saratok sebedau nyadi Palan Internet Komuniti dalam taun 2014 nyentuk diatu.

AGI TEGUH… Kubu Ranee di Saratok mengkang teguh nyentuk diatu.

Suara Sarawak