Pemidang ex-Presiden Kongres Bansa Dayak (DNC), Mengga Mikui kena 25 Mei tu tadi balat diasaika bala kaban gerempung tu.

Nya alai, Suara Sarawak bekunsika penyinu ati dikenatai sekeda raban DNC bekaul pemidang niang ti mega pengelenyau besai ngaga raban bansa Dayak.


GRANDA AING

“Siku ketuai ti tulin Dayak ti mega semampai enda ngetu negika hak Dayak.Pia mega iya mih entara ketuai ti nyadi pemun numbuhka kaul ti rat enggau raban Dayak di menua Kalimantan.


RICHARD LIAS

“Niang Mengga Mikui endang entara siku orang ti keterubah nyerakupka raban bansa Dayak ari menua Kalimantan, Sabah enggau Sarawak ti ngepunka penemuai raban bansa tu ari tiga bengkah wilayah ti mega ngujungka penumbuh Forum Dayak Borneo (BDF). Iya mega endang entara aktivis ti tulin berani bejakuka hak Dayak.


DOUGLAS ALAU

“Pemungkal Kongres Bansa Dayak (DNC) sereta mega ketuai ti chukup manah, mentas enggau mega ngembuan penyiru.Iya mega entara kaban ti chukup kemerah enggau mega aktivis ti enda nemu putus pengarap dikena ngetanka bansa Dayak.Pengelenyau ti mai pengerugi ngagai bansa Dayak.


DIANA DAVID ITANG

“Niang Mengga Mikui, siku ari ketuai ti mentas tang chukup terit. Iya enda leju meri jaku peransang ngagai nembiak rebak baru awakka sama niri negika bansa. Siti jaku iya ngagai aku ti seruran dikeingatka aku iya nya “anang bekira lebuh bejalaika pengawa nulung anak bansa, pengelelak deka dibayar lebuh nuan meda bansa diri duduk ba atas baka bansa bukai”. Ba aku pemidang iya enda disadang tang nama iya meruan dikenang.


PAUL RAJA

“Siku ketuai ti nadai nemu ngembuan penemu ke putus pengarap dalam negika hak Dayak. Pia mega ba hari kepenudi pengidup iya taja enda bepengerai, niang agi regas ba pengawa politik sereta ngaga promosyen ungkup bansa Dayak.Niang mega endang orang ke lantang ngemansutka jaku kelebih agi ti ngaul komuniti Dayak

Suara Sarawak