KUCHING: Opis Bomba enggau Penyah Penusah Malaysia (JBPM) merambu raban bomba diberi slot ba segmen kemahiran hidup di sekula ba menua tu ngambi nerangka topik pengelikun ba ai.

Tuai Direktor iya, Datuk Seri Mohammad Hamdan Wahid madah, nya entara pekara diguna diatu laban kes bebadi ba ai entara kes pemadu mayuh dirikod di menua tu dibanding penusah angus.

“Kokurikulum sekula diatu bisi ngajar pasal chara ngidup enggau nyaga pengelikun diri.

“Aku pechaya nengah modul baka tu, bomba ulih ngaul diri sereta meri chara nyaga pengelikun ngagai bala nembiak.

“Modul tu diajar ungkup nembiak ari renggat primari nyentuk sekondari,” ku iya nerang.

Mohammad Hamdan mansutka jaku lebuh diasuh ngelansa ripot berita bekaul penusah ke nyadi minggu nyin tadi lebuh nembiak ngena rakit enggau tung meraka sungai di Sabah.

Nambahka nya ku Mohammad Hamdan, modul pengelikun ba ai nya udah diajar di Putrajaya pasal chara pengelikun di ai sekalika ba pintu ai, sungai, tasik, ai wong enggau tebing pantai.

Asil program nya nunjukka empas positif laban tebal agi nembiak nemu nyemerai tauka abis nadai ulih nyelamatka bakih sida ke lemas.

Ungkup rikod, tebal agi sida ke lemas ba menua tu beumur entara 9 ngagai 39 taun.

Suara Sarawak