KUCHING: Datuk Seri Alexander Nanta Linggi nerima manah penemu Premier Sarawak Datuk Patinggi Tan Sri Abang Johari Tun Openg ti enda ngemendarka parti (luar) ti bepengkalan di Semenanjung Malaysia ngerembaika sayap sida kitu ungkup Pengawa Bepilih Besai (PRU-15) ti deka datai.

Ku Sekretari Besai Gempung Parti Sarawak (GPS) nya, Abang Johari udah suah ngeluarka penerang nya ke alai GPS deka bediri ba semua 31 penuduk rambau PRU tu ila.

“Tu nyemetak nunjukka penegap runding parti kami (GPS) enggau nya aja meh jam diatu,” ku iya lebuh ditanya Suara Sarawak apin lama.

Lebuh ditanya baikka GPS deka berandau meri peluang ngagai parti bakih ti bepengkalan di Semenanjung, Nanta nyemetak madahka iya enda deka ngeluarka sebarang penerang tauka melaba.

“Kami nitihka jaku Abang Johari laban iya chairman GPS, nya meh buah runding GPS,” ku iya.

Iya madahka ungkup PRU ti deka datai, GPS udah besedia.

“Tambah mega pengawa bepilih besai nengeri baru udah tembu, raban komiti kami seruran besedia enggau nyikap diri napi pengawa bepilih besai ti deka datai.

“Bagi kami di Parti Pesaka Bumiputera Bersatu (PBB), kami deka ngaga aum tiga taun sekali bulan June tang maya nya mega pampang kami deka ngatur aum berandauka isu politik.

“Nya alai, pekara nya mayuh mantu kami nyikap diri napi pengawa bepilih enda lama agi,” ku iya.

Dulu ari nya, dalam randau Abang Johari sebedau pengawa bepilih besai nengeri bulan Disember taun siti nyin kemari, Presiden Parti Pribumi Bersatu Malaysia (Bersatu) Tan Sri Muhyiddin Yassin madahka pemutus enggau sempekat udah digaga iya nya Bersatu deka nyukung GPS ba pengawa bepilih besai nengeri enggau enda nirika sebarang chalun ari parti sida.

DATUK SERI ALEXANDER NANTA

Suara Sarawak