MIRI: Serakup Raban Media Utara Sarawak (NSJA) deka ngatur Pengerami Makai Lemai Ngenang Jasa Media beserimbai enggau Hari Raban Media Nasional (Hawana) kena 27 Mei tu.

Chairperson Pengatur Pengerami, Catherine Igang madah, pengerami nya deka dipenyadi Sapit Premier Sarawak, Datuk Seri Dr Sim Kui Hian di Hotel Mega, Miri.

Ku iya, haribulan nya dipilih beserimbai enggau hari keterubah surat kabar Utusan Melayu dichelak kena 29 Mei 1939.

“Kami merambu ngatur pengerami nya berindik ari Atur Pengawa Standard (SOP) ditendur bepun 1 Mei tu tadi,” ku iya nerang.

Ku Catherine, Hari Raban Media Nasional udah diaku Perintah Sarawak kenyau ari taun 2018 lalu pengerami tu diatur dikena ngedutka agi kaul entara semua pemberita ba selampur Malaysia.

Nambahka nya, Catherine nesau mensia mayuh ke deka meri sukung dipinta nyuaka pemeri perais enggau chabut tikit benasip malam nya kelai ngenang jasa media.

“Endur begambar mega deka disediaka hotel laban nya keterubah iya NSJA ngerami Hari Raban Media Nasional,” ku iya nerang.

Dulu ari nya, Menteri Besai Datuk Seri Ismail Sabri Yaakob madah perintah setuju netapka 29 Mei nyadi hari ngingatka Hawana enggau deka diintu ninting taun.

AUM PEMBERITA… Kaban NSJA begambar ungkup kenang pengudah aum pemberita Pengerami Makai Lemai Ngenang Jasa Media Miri.

Suara Sarawak