AZIZUL ANNUAR

KUCHING: Penanggul tebing tasik tusur patut diperatika Perintah Sarawak laban nya tau ngeruga genturung pendiau enggau ngujungka pantai tengelam nyema enda diberi perati.

Adun Tanjong Datu, Azizul Annuar Pehin Sri Adenan madahka peningi paras ai tasik ulih nyadi taja enda dipeda ke alai raban saintis udah meri gerah madahka tikas ai tasik majak niki.

“Sarawak mega nerima pangka tebing tasik tusur ke alai nitihka pansik ari palan Pemansik Ai Menua Malaysia (NAHRIM) kena 2019 tikas ai tasik dipelabaka niki nyentuk semeter ba taun 2100.

“Palan ti nerima pangka pantai tusur kelebih agi ba Dun Tanjong Datu iya nya Kampung Sampadi, Kampung Rambungan, Kampung Stoh, Kampung Belungei enggau Kampung Telok Melano,” ku iya.

Azizul Annuar madah munyi nya lebuh mantaika mosyen basa nyukung jaku Tuai Pemegai Menua (TYT) Tun Pehin Sri Abdul Taib Mahmud bejadika Aum Dun kena 17 Mei tu tadi, di Dun, kemari.

Iya mega madahka, Opis Parit enggau Entali Ai Sarawak nengah imej satelit meda pantai Rambungan bisi nerima pangka tebing tasik tusur ungkup timpuh 17 taun iya nya ari taun 2003 nyentuk 2020.

“Pantai tusur ba sepemanjai pantai Rambungan nyadi dipelabaka 110 meter, ti mai reti garis pantai udah mindah 110 meter ke dalam.

“Nya mai reti penyampau tebing tasik tusur dia nyadi dalam enam meter setaun ngujungka rumah, dandang enggau struktur di sepemanjai pantai Rambungan enggau Sampadi deka ditelan tasik,” ku iya.

Iya madahka, pekara tu mesti diperatika dalam ngadang diri napi pekara ti enda disadang nyadi.

Suara Sarawak