KUCHING: Rayat Sarawak dipinta ngemeran ulah rindu macha bup nentuka penemu chukup ngambi ulih ngemansangka menua dudi hari.

Premier Sarawak Datuk Patinggi Tan Sri Abang Johari Tun Openg madahka pekara tu seriris enggau utai diperambu iya nya Sarawak nyadi menua maju.

“Kitai bisi semua utai diguna dikena nentuka Sarawak ulih nyadi menua maju. Tang mesti bisi penemu enggau chara baka ni rayat ulih ngemansangka pemansut dikemisi ba menua tu,” ku iya.

Abang Johari mansutka jaku nya ba Pengerami Nanggam Kaul Media enggau Premier Sarawak di Hotel Pullman, Hari Tiga tu tadi.

Ngelansa pasal kaul enggau media, Abang Johari madah, raban pemberita enggau pemacha mesti nentuka penerang ti dibantai nya bisi integriti.

“Enti kitai bisi atur maya bejalaika pengawa nyadi pemberita, kitai mega ulih ngubah penemu enggau peragam rayat lalu pekara tu mesti bisi kualiti,” ku iya.

Pia mega, Premier Sarawak madahka komunikasyen nengah media nya beguna amat lebih agi berita ti ayan sebelah media rama nya apin ditemu pengamat.

Iya mega ngelalau mensia mayuh bejimat mantaika jaku ke ditulis dalam media rama dikena nyeliahka bala bukai ari saru penemu.

“Reti iya, mayuh pemar diatu lalu media ngesan tanggung pengawa berat ba pekara tu.

“Ba aku, media nya nyadi pelasar bekunsi ke penemu tang sida ke enda meretika pekara tu deka saru penemu lalu sida ti meretika pekara tu ngembuan runding ti manah,” ku iya.

Abang Johari mega meri terima kasih ngagai raban media di Sarawak laban udah bebendar gawa nentuka berita ti betul dikerembai sekumbang pandemik Covid-19.

“Nya kebuah, aku masukka raban media nyadi penerima Bantu Khas Sarawakku Sayang (BKSS) maya pandemik lalu Sarawak aja ke nyendiaka bantu baka nya.

“Kebuah pia laban kami ngenang pengelelak raban media sama enggau semua terabai komuniti napi pemar ketegal pandemik tu,” ku iya.

BAJIK… Premier Sarawak Datuk Ptinggi Abang Johari Tun Openg nyuaka perais ngagai siku pemberita ke menang kategori pekayan pemadu gap. Bela dipeda (ari kiba), Datuk Seri Fatimah Abdullah, Datuk Amar Douglas Uggah Embas, Datuk Abdullah Saidol enggau Datuk Seri Dr. Sim Kui Hian ba Pengerami Nanggam Kaul Media Enggau Premier Sarawak 2022 di Kuching malam ensana. -Gambar Ghazali Bujang

Suara Sarawak