‘TERIMA KASIH PENGAJAR’ tu endang seleka jaku ti pemadu besai amat reti enti disebut ngagai orang ke kala nyadi pengajar dalam nempa pemujur genap iku kitai di dunya tu.

Pia mega, nyadi pengajar endang tanggungpengawa ti chukup besai dalam nempa siku nembiak dikena iya ngiga enggau nenggau jalai pengidup ke meruan jemah ila.

Beserimbai enggau Hari Pengajar tu, pengari Suara Sarawak bisi ngerandau siku pengajar ti udah meri jasa sepengelama 38 taun bidang nyadi pengajar.

Ex-pengajar Annie Chirang @ Cherang madahka diri endang asal ari Pakan lalu diatu iya diau ba Rumah Hillary Apau di Rantau Sabong.

Ku pengajar Annie, iya berengkah besekula ba Sekula Primari (SK) Nanga Manding lalu nampung pelajar ba Sekula Sekondari (SMK) Pakan.

Ex-Pengajar Annie Chirang @ Cherang

Pengudah nya iya madah diri nampung pelajar ngagai ngagai sebuah sekula perintah ba menua Binatang ke diatu disebut Bintangor.

“Kenyau ari Primari Tiga, aku endang udah bisi ati deka nyadi siku pengajar laban diumbaka maya nya nadai mayuh macham pengawa kelimpah ari nyadi pengajar, kerani enggau indu misi.

“Sebedau aku diambi belatih nyadi pengajar ba Institut Palan Pematih Pengajar (IPG) Batu Lintang di Kuching, aku endang udah bulih nyadi indu misi begian ngeli.

“Tang aku nulak pengawa nya laban ati aku endang chukup rinduka pengawa nyadi pengajar nyentukka aku pinchin,” ku Annie nusuika pejalai iya nyadi pengajar.

ENDA SALAH PILIH PENGAWA

Ku iya, dalam runding iya endang enda salah milih pengawa tu laban ke ulih ngajar sereta meri peransang ngagai anak bansa diri sereta mega ke chunto ngagai empat iku anak iya ti udah mujur bulih degree.

Lebuh agi nyadi pengajar ba sekula sekondari ku iya, penguji endang bisi laban ulah nembiak kelimpah agi mayuh nguna perengka ti moden dalam ICT.

Tang maya ngajar ba sekula primari, Annie madahka dia nadai entu balat mayuh penguji semina sida iya manchal mimit laban ke agi anak mit.

“Nyau beberapa taun sebedau deka pinchin mayuh agi ga pengawa ke begunaka penemu dalam ICT.

“Laban aku orang lama enda ulih enda belajarka penemu tu tang nasip bala pengajar ke rebak baru sama enggau aku begulai gawa enda ngelakka aku kediri lalu sida iya semampai sedia deka mantu aku,” ku iya nusuika penanggul kelia.

Iya mega madahka, entara matapelajar ke kala diajar sekumbang iya nyadi pengajar ba sekula sekondari iya nya Bahasa Melayu enggau Geografi ti kala diajar iya sepengelama 26 taun.

Pia mega entara mata pelajar ke bukai ke bisi diajar iya lebuh nyadi pengajar ba sekula primari iya nya Bahasa Melayu, Jaku Iban enggau Pendidikan Moral lalu tu diajar iya sepengelama 12 taun.

Kenang pengingat kepenudi pengajar Annie enggau ngintu Hari Pengajar sebedau pinchin taun 2017 suba.

MAYUH SEKULA ALAI NGAJAR

Ngenang entara sekula ke alai iya kala naburka jasa, Annie madahka sekula tu iya nya SMK Saratok, SMK Bandar Sarikei, SMK Tun Haji Abdul Malek Cheng di Melaka, SMK St Joseph Miri, enggau SMK St Columbia di Miri.

Ba sekula primari, entara sekula tu iya nya SK Rancangan Sepupok Niah, Sk Miri enggau Sk Sungai Mador di Meradong.

Ku Annie, iya berengkah ngajar ari taun 1979 nyentukka 2017 lalu dalam pengelama iya ngajar, mayuh udah bisi berubah nitihka sistem pelajar menua Malaysia.

“Ke diatu, utai ti chukup beguna ungkup raban nembiak lalu mesti dipelajarka iya nya belajarka pengelandik teknikal ba bidang industri sereta mega Biochemical ba bidang betanam betupi, minyak enggau gis sereta mega bidang pelajar pengerai.

“Ngagai bala nembiak, belajar enggau masuk pengawa lumba endang mesti sebela ambika kitai regas enggau bisi pengelebih ari sukut runding enggau pengerai.

“Pia mega, pilih mih bala kaban ke enggau begulai ti meruan sereta anang sekali-kali ngereja pengawa ti enda manah ti muntanka jalai pegidup kita jemah ila,” ku pengajar Annie meri jaku pesan ngagai nembiak ke agi besekula.

“Aku arapka semua bala pengajar, ngajar mih enggau penuh penyabar sereta keringka ati napi penguji lalu titihka mih sistem pelajar kemaya hari tu.

“Ngena peluang tu, aku meri Selamat Hari Pengajar ngagai semua pengajar ba selampur menua Malaysia,” ku iya ngujungka randau.

Pia mega, raban Ruai Suara Sarawak meri Selamat Hari Pengajar ngagai semua bala pengajar lalu arapka penemu ke diiri bala pengajar kitai ngelama tu mai berekat ti belimpah dalam pengidup semua kitai. Terima kasih pengajar.

Gambar kenang Annie begulai enggau staf ba Sk Sungai Mador, Meradong.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak