Penganan jala ti udah nyadi.

Beserimbai enggau pengerami Gawai bansa Iban sigi enda tinggal ngaga kuih penganan jala laban kuih nya nyadi sebagi ari piring dikena miau tumu pagi hari Gawai nyadi.

Penganan jala asal iya digaga ari tepung berau, bunyuh enggau gula apung tang bekau ubah jeman ti majak moden penganan jala bisi digaga inovasyen tauka dichampur utai bukai baka gula pasir, tusu pekat, tepung jagung, tepung kentang enggau utai bukai.

Sera nyawa mensia ti deka makai kuih tu mega bebida, bisi ti deka makai penganan kurang manis, manis enggau ke bukai.

Jukie Ahad, 64 madahka ninting taun iya enda kala tinggal ngaga penganan ungkup pakai sida sebilik.

“Enti di menua (rumah panjai), kami beduruk betanak penganan berengkah ari nutuk berau, ngisak, ngeluai, betanak enggau ke bukai.

Jukie (tengah) benung begulai enggau dua iku menantu iya nanak penganan jala.

“Aku suah nyadi tukang nepu tepung ti udah diluai ke dalam tachu,” ku iya lebuh dirandau Suara Sarawak maya betanak penganan jala apin lama.

Ku indu asal Kampung Entanggor, Sebuyau tu madah, langkar penganan jala asal di lipat dua tauka dikumbai langkar mechah gelumbang.

“Tang diatu bisi mayuh bansa langkar udah digaga orang baka langkar gulung tikai enggau segitiga.

“Enti aku, aku rindu agi ke langkar asal laban ari kelia sigi langkar mechah gelumbang ti diajar bala tuai ba rumah panjai,” ku iya.

Tepung ti udah diluai.

Indai ngagai enam iku anak tu madahka iya berasai gaga laban dua iku menantu enggau anak indu iya semua landik betanak enggau ngemeranka adat asal nya.

“Menantu aku siku asal ari menua Sabah, suba iya enda entu nemu nama utai ti disebut penganan.

“Diatu udah lebih 10 taun diau ditu iya udah nemu betanak enggau nyadi peminat kuih penganan jala.

“Kekadang, maya ukai pengerami Hari Gawai pan iya mai aku betanak laban deka makai kuih asal kitai tu,” ku iya.

Jukie madahka, penganan jala nyamai diempa enggau ai kupi pengudah lelak pulai ari kebun tauka umai.

“Kekadang dua singkap abis empa aku siku, nya kebuah lebuh aku betanak enda ulih mimit, pemadu nadai 10 kilogram tepung berau.

“Diatu laban menua ti udah moden, kami meli tepung berau ari kedai aja ngambika ulih ngelimat jam betutuk enggau ngisak tepung,” ku iya.

Nyerita pasal peneleba iya enggau orang betanak penganan jala kelia, Jukie madahka pengawa ngaga kuih tu kelia enggau diau mayuh udah berubah.

“Jauh bida orang betanak kelia enggau diatu, enti kelia semua pengawa digaga ngena jari kaki diri empu enda baka diatu semua utai ulih beli.

“Nya kebuah kami beduruk entara lapan ke sepuluh iku sekali berengkah, laban pengawa nya sigi lama, kekadang apus hari baru tembu.

“Enti kelia, kami berengkah betutuk tumu dalam pukul 4 pagi, sekeda nutuk berau lalu sekeda ngisak ngena kain burak ti dianchau ke tikai bemban endur ngumpul tepung,” ku iya.

Jukie madahka, tepung berau ti ditutuk enggau ti dibeli ba pasar bisi bebida tang ketegal ngelimat awak orang di menua rindu agi meli tepung berau enti dibanding chara betutuk diatu.

“Kain burak tu ditanchang ba empat penjuru, lalu berau ti udah ditutuk deka diansar ba kain ngambika tepung alus labuh ba tikai.

“Kira rak tampak matapanas pengawa nutuk tembu, kami lalu besedia ngeluai tepung sereta betanak.

“Kelia, chukup pedis nyaga api laban kami betanak ngena dapur kayu enggau semawar, diatu chukup nyamai ngena dapur gis nya aja,” ku iya.

Taja pan, chara ngaga penganan jala jauh udah berubah tang orang di rumah panjai agi enda ninggalka pengawa tu.

Penganan jala nyadi kuih ti nadai tau enda ditungga di ruai kelimpah ai tuak enggau pemakai bukai.

Suara Sarawak