SARATOK: Bala rayat dipinta bechunto sereta bechuanka semangat beserakup ke dipandang bala tuai dalam Gerempung Parti Sarawak (GPS).

Kaban Kunsil Negeri (Adun) Krian, Friday Belik mantaika penemu nya lebuh bejaku ba sebengkah Program Tuai Begulai enggau Rayat ba Rumah Bundak, Sungai Anak Sebetan ditu kilah ensana.

Friday madahka diri chukup temegah ati meda semangat beserakup ke dipandang bala tuai ari komponen parti GPS ke ngulu program nya.

“Semangat beserakup ke dipandangka bala tuai dalam komponen parti tu patut dichunto sereta dichuan bala rayat kelebih agi rayat ba pelilih Krian ditu.

“Pekara tu patut dikemeratka ngambika perambu pemansang ulih dipejalaika begulai enggau mujur ba baruh pegai perintah GPS,” kenu ku padah Friday.

Nangkanka nya, Sapit Menteri Pengerai Mensia Mayuh, Pengawa Berumah enggau Kaunsil Kandang Menua, Datuk Dr. Penguang Manggil lebuh bejaku ba program nya ngelalau rayat menua tu nulak politik ke dipejalaika sekeda orang baka ba menua Semenanjung.

“Kebuah pia laban politik ke enda entap sereta suah merejuk ari siti parti ngagai parti bukai ulih nyeruga pejalai pemansang ba menua tu baka berapa taun tu ke udah,” pia ku padah Dr. Penguang ke mega Adun N.76 Marudi.

Enggau nya, iya nesau mensia mayuh ngambika bediri teguh ba belakang parti GPS ngerebut semua 31 iti bangku ba pengawa bepilih besai (PRN) ti deka datai ila.

Ba program nya, Dr. Penguang meri agih belanja RM20,000 ngagai JKKK Rumah Bundak enggau RM5,000 ngagai Biro Indu rumah panjai nya.

Nambahka nya, Friday bela meri agih belanja RM15,000 enggau RM5,000 ngagai JKKK enggau Biro Indu rumah panjai nya.

Penerang nya mega madahka dilabaka nyampau 1,000 iku orang temuai datai ba program nya nyengkaum raban ari Meluan, Lubok Antu, Kalaka enggau Kabong.

Sama ngulu program tu iya nya Sekretari Politik ngagai Premier Sarawak, Brian Fung enggau Alexander Asing, Pengari Adun Kalaka, Kasdi Pandi, Chairman SUPP Saratok, Cr. Phang, Pegawai Pelilih Saratok, Laga Kueh enggau Pegawai Pelilih Pusa, Bujang Ladi.

Pia mega, program tu digulu Sekretari Kaunsil Pelilih Saratok (MDS), Liam Entili, Pemancha Lim Guan Ann, Pemancha Haji Sahari, bala pengulu ari Meluan, Marudi, Kabong, Kalaka enggau bala tuai rumah.

TERIMA KASIH…Datuk Dr. Penguang Manggil nyuaka chek agih belanja ngagai Tuai Rumah Bundak.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak