TEMEGAH… Ali nyuaka anugerah ngagai siku nembiak nyulut.

SARATOK: Pemujur enggau penyulut dijapai nembiak ba Kolej Pom Enam Saratok (KTES) patut nyadi chunto enggau ditunda sekula bukai.

Sapit Menteri Pengeluar Kuasa enggau Pengeraja Asal ti mega Kaban Parlimen Saratok, Datuk Ali Biju madahka diri chukup temegah ati meda KTES mujur mai nama Saratok pegari ba renggat nasional.

Ku iya, endang patut endur kitai temegah ati laban kolej nya dipilih ba penuduk kesepuluh pemadu nyulut ba Malaysia kelimpah nyadi Kolej Pom Enam tunggal di Sarawak.

“Nadai endur kitai mantah lebuh meda penyulut dijapai bala nembiak enggau bala kita ti ngembing sida ba kolej tu lalu pengawa ti manah baka patut ditunda bala bukai.

“Ari nya tadi, kelai sukung aku ngagai pemansang penyikap perengkaguna pelajar kolej tu, RM50,000 diberi ngagai Serakup Apai Indai enggau Pengajar (PIBG) ngambi bisi dikena ngatur pengawa ke patut,” ku iya.

Ali nibarka jaku nya lebuh dikangau ngulu lalu dipebasa bejadika Pengerami Anugerah Kolej Pom Enam, Saratok Ke-7 empai lama.

Iya madah baru, besai pengandal ngagai semua nembiak ba KTES ngambi terus nyingkang maju ke mua lalu nyadi mensia ti menyana dudi hari.

“Kita tu dikeandal nyadi tuai nampung pengawa ti manah kelebih agi dikena ngemansangka menua enggau bansa jemah.

“Kami arap enggau andalka kita ulih nyadi tuai ti bisi disiplin, siruka orang bukai enggau angkunka penemu sereta taluka menua ngambi ulih nyadi chunto ngagai rebak dudi.

“Pegai teguh rambai jaku, Leading by example! We inspire!” ku Ali mantaika pengandal diri.

KENANG… Ali disempulang bala bukai begambar bebala mayuh ungkup kenang jemah.

Suara Sarawak