KUCHING: Perambu nikika gaji pengereja perintah ngagai RM1,800 nadai meri empas (ngachau) sektor peribit.

Chairman Kongres Serakup Pengereja Perintah (Cuepacs) Sarawak Omar Bahrein Unin madah, pengereja pengawa perintah engau peribit nya dua pekara ke bebida.

“Ba kami (perintah), tu nadai ngasuh charut laban pengereja dalam sektor peribit kelalu besai, dipelaba urung 11.5 juta dibanding pengereja perintah ke semina penyampau urung 1.6 juta.

“Kebendar, tu mega nadai ngeruga laban penyampau enggau kereja sida (pengereja peribit) ngagai penatai pemisi menua besai agi ari pengereja perintah, nya kebuah kami ngasaika tu nadai nyadi penanggul,” ku Omar.

Omar mansutka jaku nya ba randau eksklusif begulai enggau Suara Sarawak di Opis Cuepacs Negeri Sarawak, ensanus.

Nambahka nya ku iya, perambu nya dikena nyeriris penatai pemisi takah penyeranta menua iya nya RM2,208 sebulan.

“Kami minta RM1,800 laban ngasaika tiap pengereja perintah deka nerima elaun tetap ninting bulan iya nya elaun rumah (minimum RM300 sebulan), elaun gawa enggau bayar insentif wilayah.

“Nya kebuah nengah elaun tetap tu mega enti ditambah agi gaji RM1,800 tadi udah nyapai entara RM2,200 ngagai RM2,300.

“Pekara tu beguna amat ngambi pengereja perintah enda ngasaika sida ba takah penyeranta lalu kami kebendar enggaika pengereja perintah ba takah penyeranta nya,” ku iya nerang.

Dulu ari nya, Presiden Cuepacs Datuk Adnan Mat udah merambu gaji minimum pengereja perintah ditiki ngagai RM1,800 sebulan laban penatai pemisi sida diatu enda chukup dikena nangkup tikas gaya idup ke majak nambah.
Taja pia, Adnan mega madah perintah udah ngemendarka gaji minima ungkup Serikat Ngaul Perintah (GLC) ngagai RM1,500 tang Cuepacs tetap dekaka gaji pengereja perintah ditiki ngagai RM1,800 sebulan.

OMAR BAHREIN UNIN

Suara Sarawak