Datuk Ali Biju

SARATOK: Projek Ngaga Sambung Bekal Ai Beresi ngagai kandang menua Ulu Roban diatu udah datai ba tikas pengawa ngelangkar pelin.

Kaban Parlimen Saratok, Datuk Ali Biju madahka sepenyampau RM14.3 juta diagihka projek nya ke alai pengawa ngelangkar berengkah dikereja dalam bulan November 2021.

Ku iya, Opis Menteri Pemansang Menua Pesisir (KPLB) udah ngemendarka agih belanja nya nengah belanja Suku Kedua Taun 2021 seraya proses tinda nyiri kunteriktor dipelaba dipejalai ba Suku Ketiga Taun 2022 (June ngagai September).

“Udah tinda tembu ila, nya baru projek tu ulih dipejalai lalu kitai melaba ujung taun 2022 tauka dalam pun taun 2023.

“Aku empu udah ngatur pejalai gawa ngagai Opis Menteri Utiliti Sarawak (KUS) kena 26 Februari 2021 suba lalu udah diterang enggau silik pasal pejalai projek bekal ai ba sitak Parlimen Saratok lebih agi ba sitak Ulu Roban.

“Penerang dipadahka Sekretari Mendam KUS, Datuk Dr Alice Jawan enggau Pegawai Kanan KUS nyengkaum sida ari Opis Bekal Ai Menua Pesisir (JBALB) Kuching enggau Betong pan ngemantupka ati,” ku iya.

Ali madah, Projek Ngaga Sambung Bekal Ai Beresi ngagai kandang menua Ulu Roban nya udah dipasuk ke dalam Langgur Pemansang Malaysia Lumpar Ke-12 (RMK-12) lalu dipelanja Perintah Besai nengah KPLB enggau JBALB ti nyadi ejensi bejalaika projek.

Ngambika semua nemu ku iya, projek nya mungkur kereja ngelekat paip macham pemesai sepemanjai 14 kilometer (km), sebuah reservoir, sebuah booster station enggau kereja bekaul bukai.

“Projek tu meri penguntung ngagai peranak ari enam buah rumah panjai ti apin nerima perengkaguna pemun nya kandang diatu.

“Ari nya tadi, aku deka meri terima kasih besai ngagai Perintah Besai nengah KPLB enggau Perintah Sarawak nengah KUS ti seruran nyukung enggau bejalaika pemansang infrastruktur ba sitak Parlimen Saratok.

“Nambahka nya, aku mega deka seruran matau pejalai tu nentuka pengawa lanchar lalu ulih tembu nitihka timpuh,” ku Ali nyimpul penerang.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak