PROJEK SAWAS…Abdul Rahman bejaku nyaut tanya Adun Bukit Begunan Datuk Mong Dagang ba hari ti keempat Aum Dun, ditu kemari.

KUCHING: Projek Bekal Ai Alternatif Sarawak (Sawas) Banting Lingga dipelabaka tembu ujung taun tu.

Sapit Menteri Utiliti Enggau Telekomunikasyen ll Datuk Dr. Abdul Rahman Junaidi madahka projek Sawas tu deka meri pemaik ngagai 268 ruang bilik di Banting, Lingga.

“Ungkup penerang, diatu pengawa ti benung dipejalaika iya nya pengawa nyeruri empang enggau sistem pemantis ai ti udah bisi, masang batang paip enggau ngatur tangki ai.

“Projek tu dipelabaka nguna agih belanja penyampau RM10 juta,” ku iya.

Abdul Rahman bejaku munyi nya nyaut tanya Adun Bukit Begunan Datuk Mong Dagang ba hari ti keempat Aum Dun, ditu kemari.

Ku iya, projek tu ila deka meri pemaik ngagai 11 buah rumah panjai iya nya Rumah Rungis Gerinang Kampung Chabu Ulu Banting, Rumah Limik Jeki Kampung Chabu Ili Banting, Rumah Merikan Johnson Tanjung Punggau Banting, Rumah Encharang Duji Kampung Batu Tambang Banting, Rumah Amy Edan Kampung Bunga Raya Banting Tengah, Rumah Bruen Juben Kampung Dampa Padang Banting, Rumah Somil Babat Kampung Nansang Ulu Banting, Rumah Tan Chin Bara Kampung Nansang Ili Banting, Rumah Gerunsin Renggan Kampung Banting Ili, Rumah Kendang Nari Kampung Telok Mulong Banting enggau Rumah Baya Rajau Banting.

Suara Sarawak