PENEMU BEGUNA…Willie (dua ari kiba) nyuaka setipikit siku penyereta program nya.

KOTA SAMARAHAN: Raban orang ti bekaul enggau bidang koko dipinta ngerejista diri lengkas nyadi kaban Gerempung Kerejasama Kluster Koko Sarawak Berhad (KKKSB).

Ku Sapit Menteri Pengawa Bekebun enggau Komoditi, Datuk Willie Mongin madahka sida ti udah masuk nyadi kaban KKKSB deka teulihka bemacham pemaik ti bisi disediaka perintah.

UDAH LANDIK…Entara bala penyereta ti bisi enggau masuk program tu.

Pia mega ku iya, pengelantang enggau pemaik ungkup raban pedagang koko di Sarawak deka terus dijaga sereta diangkatka agi nengah KKKSB.

Willie ti mega Kaban Parlimen Puncak Borneo mansutka jaku tu lebuh bejadika Program Kus Pemun Pedagang Chokelit Gaga Ngena Jari ba Kompleks Sara Cocoa Cluster, kilah ensanus.

Ba program ti diatur Kaunsil Koko Malaysia (LKM) udah mujur dipasuk 20 iku penyereta ti datai ari sitak Parlimen Puncak Borneo.

Program tu dikena ngangkatka pedagang chokelit menua tu ambika ulih mansutka produk ti bekualiti sereta ulih besemekih enggau chap dagang chokelit ke bukai ti udah bisi ba makit global.

Dalam program tu, bisi mega digaga latih pengelandik bekaul begagaka chokelit sereta mega nyendiaka insentif dikena bebelika perengka dikena begaga produk tu.

NYAMAI…Chokelit digaga ngena jari ari leka koko menua Sarawak.

Bela diberi ba kus tu iya nya servis sanding penemu bekaul chara ngemansangka dagang enggau chara nyual produk ba makit dagang ti mega ulih nyadika peransang ngagai orang ke baru deka ngujika diri ba industri tu.

Kompleks Kluster Koko Sarawak tu udah dinamaka baru nyadi Kompleks Sara Cocoa Cluster ti digaga ambika ulih mandangka pengawa proses leka koko ari ringkat ke terubah nyentukka nyadi chokelit.

Konsep ti gaga tu mega endang siti inisiatif ti dipandangka nengah Program Pemansang Kluster Koko Sarawak.

Pia mega, kompleks agrodagang temuai tu mega ulih nyendiaka perengkaguna dikena ngaga proses leka koko rangkai menua tu ungkup Nengeri Sarawak enggau penyampau 50 tan setaun.

 

Suara Sarawak