SARATOK: Pekit Kumang Gawai Online Trofi YB Datuk Ali Biju 2022 udah dibuka ungkup pengawa rejister pemekit diatu.

Tuai Koordinator Pekit, Seman Endoi madahka haribulan kepenudi nganjung pom masuk pekit nya ditetapka 3 June 2022, urung pukul 11.59 malam.

Ku iya, atur masuk pekit nadai bebayar agi meruan dipejalai baka atur pekit sebedau tu enggau rejister ngena Google Form ti deka diberi ngena link https://forms.gle/DvAyyywkFThMnCKt9.

“Aku temegah ati sekali agi dilempaika pengandal ngatur pejalai pekit ti kedua tu berindik ari pemujur pekit keterubah ti diatur ngena chara baru nengah tali arus (online) dalam taun nyin tadi.

“Ari nya tadi, aku meransang semua indu dara selampur Tanah Kenyalang ngerebut peluang menggi gelar Kumang Gawai enggau perais mata duit RM10,000,” ku iya lebuh dirandau Suara Sarawak.

Seman Endoi

Seman nyemetak madah, pekit nya tebuka ngagai indu dara ke beumur antara 18 ngagai 30 taun ari raban bansa Dayak enggau mesti peranak menua Malaysia.

Kelimpah ari nya ku iya, sida mega enda tau enda agi dara, rumpas lalu nadai kala belaki sebedau masuk pekit nya.

“Kami ti dipadu nyadi komiti pengatur pekit tau tu deka bejimat agi nyerenih rintai bala pemekit ti rejister enggau bepekit.

“Nya alai aku arapka kita ti masuk pekit tu sama lurus ati lalu meri penerang ti betul enggaika nyadi penanggul tauka isu ila,” terang iya.

Kebuah Seman mansutka jaku munyi nya laban belajar ari peneleba enggau utai ti kala nyadi lebuh ngatur pekit sebedau tu.

Ku iya, mayuh utai dipelajar ti ulih nyadika lalau enggau malin kitai ukai semina lebuh ngatur pengawa baka pekit tang mega ke chuan pengidup kitai besehari sehari.

“Ari peneleba enggau utai ke nyadi lebuh ngatur pekit dulu ari tu, dia kitai sama belajar ari pengilap lalu dikemanah ngambi dipeda manding enggau engkeman ba chara ngatur pengawa.

“Udah adat kitai bepekit, bisi alah enggau menang. Pia mega lebuh ngatur pengawa, bisi pengilap, pengelemi enggau penimpang. Tang semua nya tau ke lalau kitai dudi hari,” ku iya madah baru.

Baka sebedau tu ku Seman, Komiti Pekit enda nanggung belanja ti dikena masuk pekit tu baka ungkus nyendiaka ngepan, servis nganta enggau ke bukai.

“Ari semua pemekit ke ngisi pom masuk pekit tu, bala juri profesional deka milih 100 iku aja bepelasarka Beauty-Shoot ti pemadu manah ngena ngepan penuh tauka standard nitihka ai menua ti dipilih sida.

“Ambika banding, sida diberi mark ari gambar penuh tauka apus tubuh pemadu baru ti ngerasuk Ngepan Batang Ai, Ngepan Saribas enggau ngepan ke bukai.

“Datai ba renggat Top 30, bala juri deka meda Video Catwalk ngena Ngepan Iban Penuh enggau durasyen video enda ngelui ari tiga minit lalu mesti video pemadu baru.

“Udah nya ba Top 10, bala pemekit ngaga Video Kreatif pemadu baru nitihka pengelandik enggau kreativiti sida empu dalam Jaku Iban bepalasarka rambai jaku Besaup Mekuhka Adat Enggau Main Asal Dalam Arus Pemansang ti enda ngelui ari tujuh minit,” terang iya silik.

Seman madah baru, bala pemekit dalam Video Catwalk (Top 30) enggau Video Kreatif (Top 10) tau ngena ensumbar tang bisi lebas ke alai sida enda tau ngena ensumbar ti ngundan leka jaku kamah, enda menuku enggau enda engkeman.

Ari nya tadi, bala pemekit ke sanggup rejister masuk pekit reti iya udah setuju enggau semua Atur Pekit ti udah ditetapka bala komiti lalu pemutus pekit enda tau dibantah.

“Semua pengawa ngundi ba tiap renggat ari Top 100 nyentuk renggat kepenudi dipejalai ngena Google Form nyengkaum penerang silik pan ulih dipeda ba link  –>  https://forms.gle/DvAyyywkFThMnCKt9.

“Kita mega tau telefon ngagai aku empu ba lumur 017 802 7687 enggau Penulung Koordinator, Diane Luyah (0112-500 6512),” ku iya.

Suara Sarawak