NERANG… Dr Sim bejaku lebuh nyimpul jurai opis menteri iya di Aum Dun Sarawak Ke-19, ensanus.

KUCHING: Perintah Sarawak udah ngemendarka geran penyampau RM50 juta ungkup Skim Jali Berumah Panjai.

Sapit Premier Sarawak ke mega Menteri Pengerai Mensia Mayuh, Pengawa Berumah enggau Kaunsil Kandang Menua, Datuk Sri Dr Sim Kui Hian madah, naka 30 April tu tadi, agih belanja penyampau RM47.49 juta udah diagih ke meri pemaik ngagai 76 buah rumah panjai enggau 1,608 ruang bilik.

“Ungkup taun 2021, Kaunsil Pemansang Pengawa Berumah (HDC) nengah opis menteri aku udah nerima geran penyampau RM50 juta ari Perintah Sarawak dikena bejalaika skim tu,” ku Adun Batu Kawah.

Dr Sim mansutka jaku nya lebuh nyimpul jurai opis menteri iya di Aum Dun Sarawak Ke-19, ensanus.

Ba lansa bukai, Dr Sim madahka RM515 juta diagih ngagai Opis Parit enggau Entali Ai (JPS) Sarawak dikena bejalaika 127 Projek Rayat kenyau ari taun 2018.

Ku iya, agih belanja RM34 juta ari nya disediaka taun tu dikena bejalaika 50 bengkah projek.

“Kenyau ari taun 2018 (JPS Sarawak udah diagih RM515 juta dikena bejalaika 127 Projek Rayat ke alai RM34 juta ari nya disedia ungkup taun 2022 mungkur 50 projek.

“Ari 50 bengkah projek nya, 23 projek benung digaga lalu 27 agi dipelin,” ku iya nerang.

Ku Dr Sim, taun tu Perintah Sarawak ngagihka belanja RM14.7 juta dikena bejalai bemacham projek sapat bah enggau nyeleti parit dikena mutarka penusah bah.

“RM7.5 juta ari agih belanja nya dikena ungkup tiga projek nyeleti parit iya nya di Kampung Jeriah Sibu (renggat dua) ti disadang tembu tengan bulan November tu.

“Dua agi projek nyeleti parit di Kubong, Limbang enggau Kota Samarahan ungkup renggat keterubah diatu agi dilanggur.

“Bekaul pengawa nyukat mungkur pengawa ngabas di Batang Rejang enggau Batang Igan ari nanga sungai ngagai Pasar Kapit enggau Pelagus penyauh 370 kilometer,” ku iya nerang.

Nambahka nya ku Dr Sim, pengawa matau nya dikena nentuka tikas penalam sungai di Batang Rejang enggau Batang Igan diatu benung ba renggat nyiri juru perunding.

Ku iya, laluh RM7.2 juta ari agih belanja RM14.7 juta ungkup lima projek sapat bah di RTB Sibu (renggat empat), RTB Bintulu (renggat dua), RTB Miri (renggat dua), RTB Sungai Semariang enggau pengawa nyeleti parit di Jalai Datuk Amar Kalong Ningkan sereta Jalai Datuk Tawi Sli.

Nitihka penerang, semua empat projek RTB diatu ba renggat nyiri juru perunding seraya pengawa nyeleti parit benung dilanggur.

Di baruh Program Transfomasyen Menua Pesisir (RTP) ba taun 2021, Dr Sim madahka JPS Sarawak udah diagih RM78 juta dikena bejalaika 497 projek ba bemacham renggat.

“316 projek udah tembu lalu 181 agi ba renggat dipejalai seraya taun tu mungkur 537 projek benungkus RM89 udah dikemendar lalu ba bemacham renggat,” ku iya nerang baru.

Suara Sarawak