KUCHING: Bup Sangkuh Agung enggau An Iban Boy ke dikarang siku pinchin pengajar deka disadung ba semua sekula ke ba pelilih menua Krian.

Sebengkah penerang ari Kaban Kunsil Negeri (Adun) N.39 Krian, Friday Belik madahka iya mansutka pekara nya lebuh nemuai ngabas siku pinchin pengajar, Janang Ensiring ba rumah iya ba Batu Kawa ditu lemai ensana.

Ba penemuai nya, Friday nyuaka chek ngagai Janang dikena meli bup jaku Iban ke diberi nama Sangkuh Agung enggau An Iban Boy.

Kenu ku Friday, bup ke dibeli iya nya deka disadung ngagai semua sekula ke dipegai pelilih Dun Krian ngambi nyadika bup pelasar penemu ngagai bala nembiak sekula menua nya.

“Aku ngarapka nengah pengawa nyadung bup tu ngagai sekula ulih meransang bala nembiak sekula belajarka jaku Iban enggau nyemetak agi,” ku padah iya.

Ba maya ke sebaka, Janang bela nyuaka sekeda bup enggau sebuah bup kamus jaku Iban ke dikalih ngagai jaku Inggeris ngagai Adun Krian ngambika bisi dikena iya empu.

Penerang nya mega madahka Friday enda muai peluang nya meda koleksyen bup Janang senentang pekara bekaul enggau adat sereta sejarah bansa Iban.

MANAH…Friday Belik meda sekeda koleksyen bup Janang Ensiring.

TANDA SUKUNG…Adun Krian, Friday Belik nyuaka chek meli bup ke dikarang siku pinchin pengajar, Janang Ensiring.

Suara Sarawak