KUCHING: Pengerami Pemakai Kuching datai baru pengudah dua taun belega bekau pengerekai pandemik Covid-19.

Datuk Bandar Kuching Selatan Datuk Wee Hong Seng madahka pengerami pemakai tu deka diatur kena 29 Julai nyentuk 21 Ogos tu ila.

“Pengudah garis entara menua dibuka, udah tentu sida ti diau ba mengeri andalka ulih mulaika pengidup baka suba.

“Nya alai, pengudah menua ngalih ngagai endemik, kami meri perati ngagai gaya pengerembai ekonomi ditu,” ku iya.

Hong Seng bejaku munyi nya ba aum media Pengerami Pemakai Kuching di Begunan Majlis Bandaraya Kuching Selatan (MBKS) ditu kemari.

Ku iya, sekali tu sida nyendiaka urung 250 buah palan bedagang lalu meri perati ngagai kreativiti bansa pemakai.

“Bayar suwa palan bedagang agi sebaka baka ngelama tu laban kami sigi deka mantu rayat kandang menua nambahka penatai pemisi.

“Ketegal menua Kuching udah diaku nyadi mengeri gastronomi, aku ngasaika taun tu kami deka meda mayuh agi penyelai pemakai diayanka.

“Naka diatu, kami endang nyendiaka 250 palan bedagang tang nyema bisi peminta lebih ari nya, kami deka ngatur baru nguji mantu sida,” ku iya.

Iya nandu madahka, peluang deka diberi besai agi ngagai orang ti ngayanka bansa pemakai ti nyelai, nguna tukang sumai menua enggau ngayanka pemakai dalam chara ti bebida.

Iya madahka, mija makai enggau palan duduk deka dikurangka laban deka nyaga takah fizikal raban temuai ti makai dia ila.

“Kami deka nentuka palan tu ila luas, manah, beresi enggau temuai ti datai makai ngasaika diri likun.

Nangkan nya, sida nagit urung 500,000 iku temuai deka datai nyerumba pengerami pemakai nya.

“Ba taun 2019 suba kami nerima lebih ari sejuta temuai, lalu taun tu dipelabaka manggai 500,000 iku temuai ulih datai,” ku iya.

Ungkup penerang pom bedagang ulih digiga ba https://forms.gle/Bz8M5mtuuRUH18Ba7 tauka datai ngusung kaunter lumur 8 enggau lumur 9 di Palan Servis MBKS berengkah pukul 8.30 pagi nyentuk pukul 4.30 lemai.

Sama bisi datai Sapit Datuk Bandar Kuching Selatan Hilmy Othman, Chairman Komiti Pengatur Kuching Food Festival Goh Tzi Hui enggau bala bukai.

SAMPAL DATAI..Hong Seng (dua kanan) ngayanka poster pengerami ba aum media Pengerami Pemakai Kuching di Begunan Majlis Bandaraya Kuching Selatan (MBKS) ditu kemari.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak