Siku sawa ditemu belalai ba rak pinggai
BELALAI DITU…Siku ular sawa tama dapur siku lelaki ba Jalai Chawan Lorong 10A.

KUCHING: Siku lelaki ke nguan sebuah rumah ba MBKS Treatment, Lorong Chawan 10A ditu tekenyit lebuh dapur rumah iya dipasuk siku ular sawa dua meter pemanjai, pagi tadi.

Nitihka penerang ari Bilik Ngatur Operasyen Penyaga Orang Periman (APM) Kuching madahka sida nerima kangau telefon MER’S 999 urung pukul 5.30 pagi bekaul enggau kes nya.

Berebak enggau nya, APM tu nganjung dua iku raban sida ke betuaika Komander Operasyen, Sjn (PA) Mohd Hairuddin Shah ngabas kes nya.

“Lebuh kami datai ba palan kes nya endang amat bisi siku ular sawa benung belalai ba rak pinggai ba dapur tudah.

“Penerang ari tudah madahka iya maya nya benung deka nurun nganjung anak nurun sekula tang enda mukai-mukai tedinga utai ragak ba dapur rumah sida.

“Tudah lalu ngabas ke dapur lalu tepedaka siku ular sawa belalai ba rak pinggai ba dapur tudah,” ku padah Hairuddin.

Nampung nya, ku iya, ular sawa nya mujur ditangkap sida ngena panjuk lalu dilepaska ba babas enda jauh ari endur nya.

“Nadai orang diripotka bakal ba batang tubuh berebak ari kes tu,” kenu ku tandu Hairuddin.

TEKENYIT…Siku lelaki madahka diri asaika melintang ati tepedaka siku ular sawa ba rak pinggai ba dapur iya.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak