AMPUH…SK Kerangan dituntung penusah bah ketegal gaya hari ti berunggu ujan.

LAWAS: Sekula Primari (SK) Kerangan ditu malam tadi diripotla kena penusah bah tunggal bepun ari gaya hari ti berunggu ujan.

Nitihka penerang ari Bilik Komiti Operasyen Sarawak madahka Balai Bomba enggau Penyah Penusah (BBP) Lawas nerima kangau telefon ari siku pengajar ba sekula SK Kerangan urung pukul 9.15 malam bekaul enggau penusah nya.

Pengajar Mansur minta bantu ari raban kami ketegal sekula sida dituntung penusah bah sereta irauka pengelikun bala pengajar.

“Lebuh raban kami datai ba palan penusah nya urung pukul 9.21 malam endang amat bisi penyadi penusah bah tiga kaki penalam nuntung sekula nya ke ngampuhka sekeda kandang endur dalam sekula nya.

“Taja pia, pengawa matau ke dipejalaika raban kami ngagai tikas ai bah nya mandangka ai bah nya benung surut,” ku penerang ari Komander Operasyen, PPgB Azman Ibrahim.

Kenu ku iya mega, raban sida bela ngelalau tudah ngambika pindah ngagai palan ke likun agi tang tudah enggai dipindahka berebak ari penurun tikas ai nya.

Nampung nya, ku iya, sida mega bisi nerima ripot madahka Padang Bilun (STOLport) Lawas mega napi penusah ke sebaka malam tadi.

“Pun penyadi penusah bah tiga kaki penalam ba endur tu bepun ari penanggul pengujan ke enda ngetu tunga ke ulu Sungai Lawas.

“Berebak enggau nya, palan tu deka ditutup enda lama laban deka meri awak ngagai pengawa meresika palan tu pengudah ai bah,” ku padah Azman.

Ku tandu iya, nadai orang diripotka bebadi lemas tauka bakal berebak ari penusah tu sereta ngelalau peranak menua nya ngambika semampai bejaga sereta nyaga pengelikun diri.

Suara Sarawak