KUCHING: Opis Menteri Betanam Betupi Moden enggau Pemansang Sarawak ngarapka Sarawak nyapai tikas nupi diri (SSL) urung 60 peratus manggai taun 2030.

Menteri iya Datuk Seri Dr Stephen Rundi Utom madah, tu dikena nyapai juluk perintah nyaup nambahka penatai pemisi ruang bilik ninting bulan raban B40 penyampau RM6,000 sebulan.

“Ba Semenanjung Malaysia, tikas nupi diri tu udah nyapai urung 75 peratus. Nya kebuah, kitai (Sarawak) enda ulih bepanggai ngagai pemakai import ari menua luar aja,” ku iya nerang.

Rundi mansutka jaku nya ngagai pemberita pengudah bejadika Program Mantar Aco Lepa Ajau Birami Gawai di RTM Sarawak, kemari.

Berebak enggau nya, Rundi ngelalau raban pekebun bejalaika inisiatif ngubah pengawa bekebun enggau betanam betupi sida nyadi dagang.

Ku iya, sektor betanam betupi nya sebagi ari sektor pemansang strategi menua lepas Covid-19 ngambi nempa komuniti bepenatai pemisi tinggi manggai taun 2030.

“Opis menteri deka mantu raban tu nambahka produktiviti enggau penatai pemisi.

“Aku pechaya nya aja chara nyapai tuju tu nentuka pekebun bekenaka teknologi baru baka betanam betupi pintar enggau ngena Internet of Things (loT),” ku Rundi nerang.

Nambahka, Rundi ke mega Adun Kemena minta sektor peribit ngaul diri ba bidang tu dikena mantu Perintah Sarawak ngubah pekebun ngalih ngagai chara moden di menua tu.

Ku iya, ungkup tuju nya, sektor peribit deka ngiring semua pekebun, ngajar sida enggau nentuka sida nitihka kualiti kelimpah nyual produk.

Nangkan nya, Rundi madahka opis menteri keran mantu raban pekebun nyengkaum agih belanja, infrastruktur, sistem entali ai enggau telekomunikasyen.

Taja pia ku iya, opis menteri deka bejalaika inisiatif bepelasarka pengulih dikena nukar bantu enggau subsidi nambahka asil betanam betupi.

Nya alai, Rundi ngarapka pengawa betanam betupi deka nyadi pemun strategi perintah lepas Covid-19 ujung taun 2030 enggau nyadi pengeksport pemakai beresi.

PEMAKAI ASAL… Rundi ngaga Kuih Chap ke mega pemakai asal Pengerami Gawai Dayak. Sama bisi dipeda Pemangku Direktor Opis Betanam Betupi Sarawak Dominic Chunggat (dua ari kiba) ba Pengawa Bejadika Program Mantar Aco Lepa Ajau Birami Gawai 2022 di RTM Kuching, kemari. – GAMBAR GHAZALI BUJANG.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak