Tamu Batang Ai sebengkah palan ti mayuh bedajaka asil babas enggau sungai semampai dedat ditapatka mensia mayuh ti datai ari menua semak tauka jauh.

Siku peranak menua nya, Emmellia James Garra madahka tamu tu semina dibuka Hari Enam aja ninting minggu muakka pagi lalu pagi Hari Minggu sida deka bedaja ba tamu Lubok Antu.

“Tamu tu chukup dedat ditapatka mensia mayuh kelebih agi sida ke diau ba genturung pendiau ditu laban deka bebelika lauk baka sayur babas enggau asil sungai.

“Nambahka nya, kasam, salai enggau telu ikan nyengkaum ikan tilapia Batang Ai ke chukup tebilang ba selampur menua kitai Sarawak pan bisi dijual ditu,” kenu ku padah Emmellia.

Peranak menua tu mega bela ngena peluang nya bedajaka utai dempa baka panggang, kuih enggau ai irup kena ngerichahka agi endur tu.

“Endur tu muntang dilawa kira ke 15 minit penyauh ari pasar Lubok Antu meransang bala temuai ke datai ngelawa palan tu sampal bebaika diri sebilik ngelantangka ati maya ujung minggu.

“Kebuah pia laban rampa menua ke chukup manah ba tekat tu balat narit ati mensia mayuh ngelawa endur tu seraya bebelika lauk,” kenu ku tusui iya.

Emmellia mega madahka tekat Batang Ai tu patut dikemadaska agi nengah pengawa numbuhka mayuh bengkah palan ngelantangka ati kena narit bala temuai datai ngagai endur tu.

“Lebuh endur tu majak ditapatka bala temuai, peranak menua tu deka nguna peluang nya bedajaka mayuh macham utai baka utai dempa lalu ba maya ke sebaka ulih nyungkak penatai pemisi ngagai sida.

“Ari nya tadi, tekat Batang Ai deka nyadi siti palan ngelantangka ati ti dikerinduka bala temuai baka ba Tasik Biru, Bau,” ku iya.

DEDAT…Tamu Batang Ai ditapatka mensia mayuh.

Suara Sarawak