PBK I HENDRY JUGAH

BETONG : Mensia mayuh dilalau nyaga pengelikun ba rumah panjai enggau rumah nyembuah nyeliahka penyadi penusah angus maya pengerami Gawai Dayak tu ila.

Pemesai Bomba ari Balai Bomba enggau Penyah Penusah (BBP) Betong, PBK I Henry Jugah madahka, taja berami tang pengelikun patut dikemeratka dulu ambika ulih nyeliahka penusah ti enda disadang.

“Enti kita udah berapi tauka bepandukka lauk sereta begagaka kue ngena dapur gas, dapur kayu tauka ngena karan mesti diperatika kita sampai mansau.

“Udah semua perengka ke dipanduk mansau magang, kita mesti madamka ke semua nya baru kita tau ulih enggau orang berami,” ku tangkan Henry.

Kelimpah ari nya mega, iya minta Komiti Pemansang enggau Pengelikun Genturung Pendiau (JKKK) ba rumah panjai ngaga gerah ngasuh madamka utai ti dipanduk enti udah mansau baru tau pansutka ruai.

Ku tandu Henry, kelimpah ari nya mega mensia mayuh dipinta anang udu bekunsika bekenaka karan ngena siti plak enggaika karan nya nyadi lebih berat tauka angat ti tau ngemai penusah ngagai rumah panjai.

“Ngagai bala mayuh ke bisi nginsap, aku minta kita anang udu bebuaika papung insap ke bedau bara api sengapa alai baka ba baruh rumah, selepak tikai, selepak dinding tauka dini-dini alai.

“Tang tentuka papung insap kita ti deka dibuai udah dipadamka dulu enggai ka iya ulih mai penusah.

“Laban maya Hari Gawai, tentu mayuh kerita, motosikal, enggau injin sepit lalu semua perengka tu bisi ngundan minyak binjin.

“Pia mega, ngagai bala ke betunuka merechun, tentuka endur nunu merechun jauh ari endur rumah panjai sereta mesti nemu nyaga pengelikun diri,” ku tandu Henry.

Suara Sarawak