SERIAN: Sekretari Besai Parti Pesaka Bumiputera Bersatu (PBB) Datuk Seri Alexander Nanta Linggi dekaka kaban komiti PBB Pampang Tebedu bebendar gawa dalam siti tim dikena nentuka parti nya meruan diterima.

Ku Nanta, tu dikena nentuka pemansang ungkup rayat ulih dikemujur enggau servis pemadu manah ulih diberi ngagai peranak enggau rayat ba sitak nya.

“Enti sida bagas gawa, proses politik ke nyadi agenda besai ulih nentuka pemansang enggau pengelantang mensia mayuh sereta menua dijaga enggau manah,” ku iya nerang.

Nanta mansutka jaku nya lebuh bejadika Pengawa Nangguhka Aum Tiga Taun Sekali PBB Pampang Tebedu di Balai Tayung Langui, Kampung Pichin, ensanus.

Ku iya ke mega Kaban Parlimen Kapit, PBB ngembuan turai sejarah panjai enggau agi ngetanka agenda nya nyentuk diatu.

“Nya kebuah, kami (PBB) bisi tuju enggai nitihka chuan parti politik di Semenanjung Malaysia.

“Taja gaya politik berubah, kaban parti mesti nemu nadai sapa ulih ngelui parti,” ku iya.

Nambahka nya, Nanta meri terima kasih ngagai raban pengatur aum pengari laban udah ngatur aum ninting taun PBB Pampang Tebedu nya.

Bejaku ba pengawa ke sama, Mandal Presiden Kanan PBB Datuk Amar Michael Manyin Jawong ngelalau kaban parti nya terus taluk ngagai parti ke lama udah ditumbuh ke alai nya entara komponen parti dalam Perintah Gempung Parti Sarawak (GPS).

“Semua kaban parti mesti besumpah taluk ngagai parti maya TGM lalu sida mega mesti besemaya mantu ketuai kitai.

“Tang sida nya pengerusak laban ngalih pengudah pengawa bepilih lalu ngundi penyakal,” ku Manyin.

Manyin mega madah, majoriti rayat Sarawak udah nerima enggau nyukung GPS lalu pekara tu nyata dipeda lebuh Pengawa Bepilih Nengeri Ke-12 (PRN-12) apin lama enggau bulih majoriti besai.

Manyin mega minta dua pekara besai diperati iya nya politik enggau pelajar nentuka parti nya meruan diterima.

Sama datai Adun Tebedu Dr Simon Sinang Bada, Adun Bukit Semuja John Ilus enggau Sekretari Politik Premier Sarawak John Nyigor.

TERUS TALUKKA PARTI… Nanta (tengah) begambar ungkup kenang enggau raban pengari PBB Pampang Tebedu di Balai Tayung Langui, Kampung Pichin, ensanus.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak