Jennia Janet begambar kenang enggau raban penari lagu Seribu Satu Ulah Gawai.

Pengerami Gawai Dayak diatu nyau deka nuntung ba timpuh endur nyadi, nya alai raban ari serikat pemerindang TJKSB Music Production meri Selamat Gawai Dayak nuju semua ke bansa Dayak.

Nitihka penerang Penulis Leka Lagu Pelandai TJKSB, Uncle Lih Achop taun tu, sida sebuat mungkal pengerami Gawai kami ngena Geliga Pengelalu Pengabang.

“Diatu leka sada Geliga Pengelalu Pengabang udah ulih didinga ba channel YouTube TJKSB.

“Sebaka enggau serikat pemerindang bukai, taun tu kami mega bisi ngeluarka tiga buah lagu Gawai iya nya Seribu Satu Ulah Gawai (Jennia Janet) Ingat-Ingat Lalat (Victoria Eagel Crown enggau Boenhoffer) sereta Begawai Di Rumah Panjai (Eagle Crown).

“Nya alai kami (TJKSB) besai endar pengarap ati semua lagu Gawai tiga buah tu ulih dikena merindang bala peninga serayaka ke berami.

Penulis Lagu Pelandai TJKSB…Uncle Lih Achop

“Tang, ukai mina rindu ninga patah sada nyawa enggau tabuh lagu aja, kami mega besai pengarap leka lagu kami ulih meri empas ke beguna, sereta tau diambika tenggau lalau maya kitai ngintu Gawai.

Nya alai enggau naka penyimat aku ngerintai sereta nusun leka iya, ngambika enda betabu sereta gerantang didinga,” ku Uncle Lih.

Berebak enggau nya, ngelansa pasal lagu Seribu Satu Ulah Begawai ti disadaka, Jennia Janet, nya meh pemungkal kelang lagu Gawai TJKSB taun tu.

Nyadi sekeda genteran leka iya munyi tu ; Abis gawai mayuh penyakit, Tulang lumbu buruk gawa, Anak pulai ngerepas duit, Nadai belanja bai sekula.

Nya meh sekeda ulah bansa kitai, Nadai wawasan nyambut hari Gawai, Ngirup..o..o..ngirup enggai belala, Tiap hari baka ke begawai belama.

Ingat-Ingat Lalat lagu Gawai baru disadaka Victoria (kanan) enggau Boenhoffer.

Udah nya, lagu kedua diberi nama Ingat-Ingat lalat’ ti disadaka Victoria Eagle Crown betimbal enggau Boenhoffer. Lagu tu nyeritaka bujang dara ti nyau enda ngelala pangan diri, laban lama enda betemu lebuh ngabang Gawai.

Nyadi sekeda ari genteran lagu nya munyi tu ; Sapa dara nya bajik amai mua, Beimbam selampai bekain kebat, Ngelalu pengabang migai pedara, Asai ke ngelala tang ingat ingat lalat.

Sapa bujang nya bebaju burung, Bungah amai nuntum garung, Sekali ngilas merening mua,Asai ke ngelala asai ke enda.

Lalu lagu Gawai ketiga TJKSB iya nya Begawai Di Rumah Panjai’ ti disadaka raban Eagle Crown nyeritaka pengaga ati setegal ke ulih begulai berami begawai enggau kaban belayan apai indai dirumah panjai.

Bekau ke lama enda pulai laban bisi penanggul ke enda ulih seliah. Lalu sekeda leka iya munyi tu ; Lama nadai begulai Gawai, Enggau menyadi apai indai, Setegal ditekul penanggul besai,Enda ulih pulaika rumah panjai.

Semalam malam sampai pagi, Mantaika main penau diri, Komiti pengelikun seruran belicha, Mabuk tinduk anang belaya, Anang ngamahka Gawai Dayak.

Bebelika pemakai anang rua. Anang enda bekelimat ngena belanja, Anang bepekit mantai pengeraja, Maya ngintu Gawai Dayak.

Nya alai nya meh gaya cherita ti diselitka TJKSB dalam leka lagu tiga buah nya.

“Sekali agi arapka peninga teperindang ninga sereta empas reti iya tau nyadika lalau ke beguna ngagai kitai semua,” ku Uncle Lih.

Raban Eagle Crown taun tu ngeluarka siti lagu Gawai baru dikumbai Begawai Di Rumah Panjai.

Suara Sarawak