BETONG: Raban nembiak ditu diperansang ngerebut peluang ti bisi disediaka perintah sereta ejensi ke bukai dikena ngemajuka diri.

Sapit Menteri Nembiak, Lumba enggau Pemansang Pedagang Sarawak ke mega Mandal Presiden Saberkas Sarawak, Datuk Gerald Rentap Jabu madah raban nembiak anang semina telunga-lunga ngemataka pemujur orang aja.

“Kitai anang meda aja orang ti udah maju, titihka ka pemujur sida enggau pemansang ke udah disediaka perintah.

“Pia mega, peluang endang bisi ba sebarang alai, semina kitai empu nanya diri deka tauka enggai enggau orang bepekit ba pemansang,” ku jaku Rentap ti mega Chairman Komiti Mit Pemansang Dagang enggau Ekonomi Saberkas.

Iya mansutka jaku tu lebuh ngulu Program Roadshow Pedagang Biak-Jums Start Biznes ti diatur Gerempung Nembiak Nasional Sarawak (Saberkas) nengah kerejasama Saberkas Pampang Layar, kemari.

Program ti digaga ba ruang Opis Residen Bagi Menua Betong udah mujur dipasuk 140 bala penyereta ti datai ari mayuh bengkah pampang Saberkas di menua Betong.

Entara Pampang Saberkas ke bisi enggau masuk program tu iya nya Saberkas Layar, Saribas, Krian, Bukit Saban, Batang Ai, Engkelili, Simanggang, Kalaka enggau Kabong.

Program nya dibagi ngagai tiga renggat iya nya renggat keterubah randau bekaul penerang ngagai pedagang ti dikenataika Ikon Nembiak Sarawak enggau Malaysia 100 Top Young CEO 2020 Ahmad Qadri Basri.

Ba renggat kedua iya nya Randau Kisah Pemujur ti udah dibantaika entara beberapa iku orang dagang ke udah mujur ba menua Betong empu baka pemenggi Jessie Cake Designer, Jessie Ting.

Sama bela mantaika kisah pemujur sida ba renggat kedua mega iya nya pemenggi Stokis SugarBomb Brolin Golayous enggau Fotografi Asri Mostapha.

Ba renggat ke penudi, bala penyereta diberi penerang ari ejensi baka Kaunsil Pemansang Ekonomi Sarawak (SEDC), Centrex, Agrobank enggau Opis Pelilih Menua Betong dikena nerangka bekaul mantu orang dalam pengawa dagang.

Sama bisi datai ba program tu kemari iya nya Sekretari Besai Saberkas Sarawak Safiee Haji Ahmad enggau Residen Bagi Menua Betong Richard Micheal Abunawas.

Suara Sarawak