TERUS NYULUT…Abang Johari (tengah) begambar kenang begulai enggau bala kaban SUPP pengudah bejadika Aum Tiga Taun Sekali SUPP di Indu Opis SUPP ditu, kemari.Bela dipeda Presiden SUPP Datuk Sri Dr Sim Kui Hian enggau bala bukai. -Gambar ALIF NONI

KUCHING: Raban parti patut nyukung sapa aja ti udah dipilih baika nyadi chalun tauka nyadi tuai dalam parti nya.

Premier Sarawak Datuk Patinggi Tan Sri Abang Johari Tun Openg madahka pekara nya beguna dalam nentuka penyerakup dalam parti.

“Nyema kita dalam Parti Sa’ati Rayat Sarawak (SUPP) begempung, nya deka mai jeman ti tebilang ngagai kitai ke mua.

“SUPP, Parti Rakyat Sarawak (PRS), Parti Progresif Demokratik (PDP) enggau Parti Pesaka Bumiputera Bersatu (PBB) begempung ngetanka Sarawak ungkup jeman ti deka datai,” ku iya.

Abang Johari bejaku munyi nya lebuh Bejadika Aum Tiga Taun Sekali SUPP di Indu Opis SUPP ditu, kemari.

Ku iya, nya kebuah genap kaban dalam parti mesti ngempu tuju ti sebaka pengudah tuai tauka chalun dipilih.

“Sapa chalun ti dipilih, sukung aja, anang nyukung setengah jalai ketegal inginka pekara dikedeka nuan empu.

“Aku empu udah ngasaika proses tu, lalu aku meri perati penuh ngagai rayat dulu.

“Kelebih agi lebuh maya pengawa bepilih diatur, ati mesti lurus laban nya deka ngeruga jeman nuan ke mua,” ku iya.

Iya madahka, sukung ngagai parti mega nyadi kelai peneguh ati kaban, tang iya tetap pechaya ulah beserakup entara pekara pemadu beguna dalam parti rambau pengawa bepilih diatur.

“Aku enda kiruh kemaya Pengawa Bepilih Besai (PRU-15) diatur tang GPS udah besedia.

“Aku gaga laban SUPP tegap ketegal kitai bisi polisi ti inklusif, kitai deka ngerembaika ekonomi lalu aku pechaya kitai deka pegari baka bintang ba menua tu,” ku iya.

Sama bisi datai Sapit Premier Sarawak ti mega Presiden SUPP Datuk Seri Prof Sim Kui Hian, Presiden PRS Datuk Joseph Salang Gandum, pengari PDP Datuk Henry Harry Jinep enggau bala bukai.

Suara Sarawak