210 pemekit besemekih ba Pekit Tenpin Boling Entarabansa Kenyalang 2022

KUCHING: Pekit Tenpin Boling Entarabansa Kenyalang 2022 deka diatur ba Megalanes Sarawak, E-Mart Batu Kawa bepun 24 ngagai 26 June tu.

Pia mega, pekit tu deka ngempung 210 iku pemain ari sepuluh buah menua.

Sapit Menteri Nembiak, Lumba enggau Pemansang Pedagang Sarawak, Datuk Gerald Rentap Jabu madah, menua ke deka masuk pekit pengelama tiga hari tu iya nya Singapore, Australia, Brunei Darussalam, Thailand, Vietnam, Filipina, Indonesia, Ireland, United Kingdom enggau Hong Kong.

“Pekit tu mega dipasuk pemain ari nengeri bukai baka Sabah, Selangor, Johor, Kuala Lumpur sereta Sarawak ke deka nganjung pemain ari skuad Sukma 2022 enggau pemain ari program pemansang,” ku Rentap.

Rentap mansutka jaku nya ba aum pemberita di Bilik Aum Palan Akuatik Pandelela Rinong, Petra Jaya kemari.

Ku iya, pekit nya diatur Gerempung Boling Amatur Sarawak (Abas) enggau kerejasama Kaunsil Lumba Sarawak (SSC) nyendiaka kategori tebuka sereta kategori nembiak enggau empat renggat umur.

“Kategori nembiak dibagi ngagai empat iya nya baruh 12 taun, baruh 15 taun, baruh 18 taun enggau baruh 21 taun,” ku iya nerang.

Rentap mega pechayaka pekit tu nerima sambut ke chukup manah laban tu pekit keterubah dipasuk pemain pengudah lebih dua taun enda diatur ketegal pandemik Covid-19.

Sama datai ba aum pemberita tu iya nya Sapit Presiden ABAS, Haji Shaifulbahri Shukri, Mandal Presiden ABAS, Robert Lu Nam Min enggau Tuai Jurulatih Tenpin Boling Sukma Sarawak 2022 Jackson Ting Nik Soon.

Kelimpah ari nya, iya pechayaka pekit tu meri peluang ngagai pemain lebih agi ari skuad Sukma 2022 ngansah pengelandik enggau penau sida.

“Aku ngarapka bala pemain ulih ngena peluang ari pekit tu ngansah pengelandik diri,” ku Rentap nerang baru.

Suara Sarawak