ENGKILILI : Pelilih Mit Engkilili benung ba renggat atur dipinta diangkat nyadi pelilih penuh lalu dua bengkah agi sitak iya nya Skrang enggau Lidong dipinta nyadi pelilih mit dikena ngemuntangka agi tusun pengawa ba sitak nya.

Kaban Kunsil Nengeri (Adun) Engkilili, Dr Johnical Rayong Ngipa madah pengawa ngemujurka juluk nya begunaka sukung ari mensia mayuh lebih peranak ke diau ba sitak Engkilili empu.

“Ngelansa sentang pemansang ba sitak Skrang, aku minta semua Gerempung Ukai Perintah (NGO) baka Gerempung Kaunselor tauka Tuai Rumah, Sapit Tuai Rumah ba sitak Bangat, Lidong enggau Skrang terus bekerejasama dikena nyapai juluk tu.

“Kitai bela nemu, kenyau ari taun 2006, mayuh ubah pemansang udah digaga ba sitak Bangat, Lidong enggau Skrang asil ari sukung enggau kerejasama rayat mayuh.

“Nya alai, aku aku ngelalau semua kitai anang bepechah ketegal politik laban ulah bepechah deka nekul pemansang ke digaga raban bekaul sereta meri pengerugi ngagai rayat empu,” ku iya.

Rayong madah munyi nya ba Pengerami Ngiling Bidai diatur ba Rumah Anching, Langkang Ili, Skrang Ili ditu apin lama ke udah.

Berebak enggau nya, Rayong madahka pengaga ati diri laban ulih begulai enggau bala tuai raban bansa ari Skrang Ili ngemujurka pengerami nya.

Bisi 16 iku tuai rumah datai enggau ngerichahka pengerami tu iya nya Tuai Rumah Anching ari Langkang, Tr Buli, Lidong, Tr Meringgar, Lidong Belaki, Tr Mambu diarika anak iya, Tr Melisa, Kubal Pengkalan, Tr Aron, Kubal Lumok, Tr Ensudin , Tisak, Tr. Karin, Tabut, Tr Banta, Kubal Batu
Tr Jelendai, Lipat Lama, Tr Francis Jua, Kaong, Tr Jangin, Kejemut, Tr. Evelyn Mai, Tekalong ,Tr Tinggi , Delok Skrang, Tr Tinggom, Kubal Duan enggau Tr Dain, Langkong.

Pia mega, Rayong bisi nandu pekara madahka iya udah dikenuku Presiden Parti Sarawak Bersatu (PSB) bediri minta pilih ngarika parti nya ba Pengawa Bepilih Besai (PRU) ke-15 tu ila ba sitak Parlimen Lubok Antu.

Ku iya, tu dikena nambahka agi pemansang sereta tikas pengidup rayat ba sitak Engkilili. Iya mega besemaya deka terus mantaika isu-isu ke nekul pengidup rayat baka ungkus pengidup ke majak tinggi empas ari rega barang ke majak niki.

Udah nya, Rayong bisi ngagihka belanja ngagai Komiti Pemansang enggau Pengelikun Genturung Pendiau (JKKK) Rh Anchin penyampau RM3,000, Biro Indu Rh Anchin RM3,000 enggau Gerempung Kaunselor/Tuai Rumah/Sapit Tuai Rumah Sitak Bangat, Lidong, Skarang bela nerima agih RM3,000.

 

NGILING BIDAI…Dr Johnical Rayong (tengah) ngesan tikai kelai udah abis begawai pengudah tikai nya tembu digiling ba Pengerami Ngiling Bidai diatur ba Rumah Anching, Langkang Ili, Skrang Ili ditu kena 6 June tu tadi.

 

 


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak